Ապօրինի գործող ձկնաբուծարան է հայտնաբերվել. նյութեր են նախապատրաստվում
Գողթ համայնքի տարածքում ապօրինաբար ձկնաբուծարան է գործել: Այս առնչությամբ, Բնապահպանության նախարարության տեղեկատվության եւ հասարակայնության հետ կապերի վարչության պետ Արմեն Վարդանյանը Facebook-ի իր էջում գրել է.
«Սոցիալական ցանցերում տեղեկություններ էր տարածվել, որում ասվում էր, որ Գողթ եւ Գառնի համայնքների հարակից Ազատ գետի հունի մեջ կառուցված են ջրավազաններ: Բնապահպանության նախարարության ջրային ռեսուրսների կառավարման գործակալության Ջրավազանային տարածքային կառավարման բաժնի աշխատակիցների կողմից իրականացված զննության արդյունքում պարզվել է, որ տվյալ վայրում առանց համապատասխան թույլտվության (ապօրինի) Գողթ համայնքի վարչական տարածքում կառուցված է ձկնաբուծարան։
Վերոհիշյալ՝ 2.5 հա հողատարածքը պատկանում է Գրիգոր Գրիգորյանին, որից 0.5 հեկտարի վրա վերջինս ապօրինի ձկնաբուծական գործունեություն է ծավալել, ինչի համար համայնքապետարանի կողմից տուգանվել 100.000 դրամով՝ հողի նպատակայնությունն ապօրինի փոխելու համար։
Ջրավազանային տարածքային կառավարման բաժնի աշխատողների կողմից պատրաստվում են համապատասխան նյութեր՝ Բնապահպանության եւ ընդերքի տեսչական մարմնին փոխանցելու նպատակով»:
