ՀՀ-ի բյուջեի եկամտային մասը գերակատարվելու է։ Մոտ 40 մլրդ դրամ ավելի է հավաքվելու, քան նախատեսված էր։ Այս մասին Ազգային ժողովում հայտարարելուց հետո վարչապետ Նիկոլ Փաշինյանն ասաց, թե ինչ են մտադիր անել այդ գումարի հետ։ «Մենք մտադրված ենք 2019 թվականի հունիսի 1-ից 10 տոկոսով բարձրացնել ՀՀ ԶՈւ զինծառայողների աշխատավարձը, իսկ 2019 թվականի սեպտեմբերի 1-ից նույն չափով բարձրացնել ՀՀ հանրակրթական դպրոցներում աշխատող ուսուցիչների աշխատավարձը։ Մոտավորապես 38 հազար ուսուցչի մասին է խոսքը»,- ասաց Փաշինյանը։ Դրանից բացի՝ վարչապետի խոսքերով` նախատեսվում է իրականացնել տարբեր մակարդակի 303 կիլոմետր ճանապարհների նորոգում, հիմնանորոգում և այլն։ Սա, ըստ Փաշինյանի, նույնպես աննախադեպ է վերջին 9 տարիների համար։ Նա նաև նշեց, որ զինվորականների սպառողական վարկերի վերակառուցման կառավարական ծրագրից արդեն օգտվել է 400 զինվորական։ "Այսինքն` վարկը վերակառուցվում է, ավելի ցածր տոկոսով վարկ է առաջարկվում և ավելի երկար ժամանակով մարելու համար։ Իրենք պետք է ուղղակի դիմեն իրենց բանկերին", – ասել է Փաշինյանը։ Նա ասաց, որ վարկերի մարմանը կօգնի նաև զինվորականների աշխատավարձերի բարձրացումը, որը, եթե հնարավոր լինի հասցնել կազմակերպչական առումով, կիրականացվի հուլիսից։