«Հեռանալու եմ այն ժամանակ, երբ ինքս ցանկանամ, ոչ թե երբ դուք եք դա ուզում». Ռոնալդու

Պորտուգալիայի ազգային հավաքականի ավագ Կրիշտիանու Ռոնալդուն ԱԱ-2026-ի 1/8 եզրափակչի՝ Իսպանիայի դեմ սպասվող հանդիպումից առաջ կտրուկ է արձագանքել ազգային թիմից հեռանալու վերաբերյալ հարցերին։

Հարձակվողը նշել է, որ իր նվիրվածությունը Պորտուգալիայի հավաքականին անփոփոխ է և ընդգծել է՝ կարիերան ավարտելու որոշումը բացառապես իրենն է լինելու։

«Ես միշտ այստեղ եմ՝ հոգով և մարմնով։ Անկախ նրանից՝ խաղում եմ, թե ոչ, ես միշտ իմ կարևոր դերը կունենամ։ Ես հեռանալու եմ այն ժամանակ, երբ ինքս ցանկանամ, ինչպես արդեն ասել էի մի քանի տարի առաջ։ Այլ ոչ թե այն ժամանակ, երբ դուք եք դա ուզում»,- նշել է Ռոնալդուն՝ ըստ իսպանական AS պարբերականի։

Նա նաև հավելել է, որ չի ցանկանում մշտապես վերադառնալ նույն թեմային՝ ընդգծելով, որ այժմ իր ուշադրությունը կենտրոնացած է առաջիկա հանդիպման վրա։

«Կարծում եմ՝ նույն հարցը շարունակ տալը պարզապես ժամանակի կորուստ է։ Հիմա ամենակարևորը վաղը լավ ֆուտբոլ ցուցադրելն ու հաջորդ փուլ դուրս գալուն հավատալն է»,- ասել է նա։

Հիշեցնենք, որ 2026 թվականի աշխարհի առաջնությունը անցկացվում է ԱՄՆ-ում, Կանադայում և Մեքսիկայում և կտևի մինչև հուլիսի 19-ը։