Երեխաներին վտարել են տնից. մանրամասներ` «ՌԱՖ»-ում այրվածքներ ստացած 12-ամյա երեխայի մասին. Հրապարակ

Արարատի մարզի Վեդի քաղաքում շաբաթ օրը դժբախտ պատահարի զոհ դարձած երեխաների մասին տեղեկատվություն տարածվեց, թե նրանք անօթևան էին, և դա էր պատճառը, որ քնած էին եղել այրվող մեքենայում, գրում է Hraparak. am-ը: Արարատի մարզպետարանի հասարակայնության հետ կապերի վարչության պետը Hraparak. am-ին ասաց, որ երեխաներն անօթևան չէին․ «Նրանք 6 երեխա են, և ինքը մեքենայի մեջ չի քնել (նկատի ունի՝ մշտապես), մայրը պարզաբանել է, որ այդ օրն իրենք հարեւանի տանն են քնած եղել, աղջիկը հարևանի երեխայի հետ կռվել է, նեղացել է, գնացել է մեքենայի մեջ քնելու»։ Ընտանիքը դրսում է հայտնվել մարտի 14-ին, քանի որ վերջիններս պարտք են ունեցել, Դատական ակտերի հարկադիր կատարման ծառայությունն օտարել է նրանց բնակարանը, ինչից հետո ընտանիքը դիմել է Մասիսի քաղաքապետարան, նրանց հատկացված է եղել ժամանակավոր կացարան։ Ըստ խոսնակի՝ այդ ժամանակահատվածում ընտանիքն իրերի կեսը տեղափոխած է եղել ժամանակավոր կացարան, կեսը՝ ոչ, և գիշերելիս է եղել հարևանի տանը։