2019 թվականի հունվարին Հայաստանում գրանցվել է 299 ճանապարհատրանսպորտային պատահար, ինչը նախորդ տարվա հունվարի համեմատ ավել է 7,6 տոկոսով, իսկ 2018-ի դեկտեմբերի համեմատ այդ ցուցանիշը նվազել է շուրջ մեկ երրորդով: Հայաստանի վիճակագրական կոմիտեի տվյալների համաձայն, թեեւ հունվարին ավտովթարների թիվն աճել է, սակայն մահվան ելքով ավտովթարների թիվը կտրուկ անկում է գրանցել: Այսպես, 2019-ի հունվարին ավտովթարներից մահացել է 21 մարդ, ինչը 43,2 տոկոսով պակաս է 2018-ի հունվարի ցուցանիշից: Փոխարենը 17 տոկոսով աճել է ավտովթարներից վիրավորների թիվը՝ կազմելով 468 մարդ: Ավտովթարներից զոհերի թիվը նվազել է նաեւ 2018 թվականի դեկտեմբերի համեմատ՝ 38,2 տոկոսով, իսկ վիրավորների թիվը նվազել է 15,8 տոկոսով: