Տաքսին բախվել է «Սանիթեք»-ի աղբատարին. կան տուժածներ

Փետրվարի 27-ին, ժամը 03:56-ին «911» ծառայությանն ահազանգ է ստացվել, որ Երևան քաղաքի Ռուբինյանց փողոցի թիվ 21 շենքի մոտակայքում տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը: Այս մասին հայտնում են ՀՀ արտակարգ իրավիճակների նախարարությունից: Դեպքի վայր է մեկնել ԱԻՆ ՓԾ հրշեջ-փրկարարական ջոկատից մեկ մարտական հաշվարկ: Պարզվել է, որ Ջրվեժ տաքսի ծառայությանը պատկանող «Lada» մակնիշի ավտոմեքենան (վարորդ՝ Ս. Բ.) դուրս է եկել ավտոճանապարհի երթևեկելի հատվածից և բախվել կայանած Սանիթեք ՍՊԸ-ին պատկանող «Volvo» մակնիշի աղբատար ավտոմեքենային (վարորդ՝ Ա. Մ.): Փրկարարները պատգարակով շտապօգնության ավտոմեքենաներին են մոտեցրել աղբատարի ուղևոր (աշխատակից) Ա. Մ.-ին (1987 թ.) և Ս. Բ.-ին (1958 թ.), ովքեր հոսպիտալացվել են «Հերացի» թիվ 1 համալսարանական հիվանդանոց և Սուրբ Գրիգոր Լուսավորիչ ԲԿ: Բժիշկները տուժածների առողջական վիճակը գնահատել են ծանր: Փրկարարները հոսանքազրկել են «Lada» մակնիշի ավտոմեքենան, փակել գազի բալոնի փականը, սահմանազատել տարածքը: