![Մեքենան ընկել է Տավուշի ջրամբարը. վարորդը զոհվել է](https://auroranews.am/storage/img/base_image/old/8752c90590e6649426bcffecb442faaf.webp)
Մեքենան ընկել է Տավուշի ջրամբարը. վարորդը զոհվել է
![Մեքենան ընկել է Տավուշի ջրամբարը. վարորդը զոհվել է](https://auroranews.am/storage/img/base_image/old/8752c90590e6649426bcffecb442faaf.webp)
Այսօր Տավուշի մարզում ժամը 14:00-ի սահմաններում Արտակարգ իրավիճակների նախարարության փրկարար ծառայության 911 օպերատիվ կառավարման կենտրոն ահազանգ է ստացվել, որ Բերդ-Այգեպար ավտոճանապարհի 2-րդ կմ հատվածում գտնվող Տավուշի ջրամբարում ավտոմեքենա է ընկել: Ինչպես դեպքի վայրից հայտնում է ֆոտոլրագրող Գագիկ Շամշյանը, փրկարարներն ու ոստիկանները ջրամբարից դուրս են բերել տղամարդու դի: Դեպքի վայրում հավաքվածներն ասում էին, որ ջրամբարն ընկած ավտոմեքենան ВАЗ 2107 մակնիշի է և ում դին հանել են, նա ծառայում էր ՀՀ ՊՆ N զորամասում՝ որպես պայմանագրային զինծառայող: Փրկարարները փորձում են հատուկ տեխնիկա բերել դեպքի վայր, որպեսզի ավտմեքենան դուրս բերեն ջրամբարից: Ոստիկանները հայտնաբերել են նաև բախման վայրը, որտեղ ակնհայտ երևում է, որ վարորդը ավտոմեքենայով դուրս է եկել ճանապարհի երթևեկելի գոտուց, բախվել երկաթբետոնե արգելապատնեշներին և հայտնվել ջրամբարում:
Լուսանկարը՝ Գագիկ Շամշյանի