Ադրբեջանական մակնշմամբ կոնֆետ է հայտնաբերվել Հայաստանի խանութներում
Հայաստանյան խանութներում ադրբեջաներեն մակնշմամբ կոնֆետներ են հայտնաբերվել։ Այս մասին հայտնում է armeniasputnik am-ը՝ հղում տալով Սննդի անվտանգության պետական ծառայության պետ Գեորգի Ավետիսյանին։
«Կոնֆետը հայերեն մակնշում չուներ, բայց ուներ ադրբեջաներեն մակնշում։ Մի քանի լեզվով մակնշում կար, բայց հայերեն չկար»,– լրատվականի հետ զրույցում ասել է Ավետիսյանը։
Ավետիսյանը նշեց, որ սա հայաստանյան օրենսդրության խախտում է, այլև նշանակում է, որ կոնֆետները նախատեսված չեն եղել Հայաստան արտահանվելու համար․ «Ներմուծողին չկարողացանք գտնել։ Կոնֆետները ձեռք են բերվել «Սուրմալու» տոնավաճառից։ Կա՛մ մաքսանենգ ճանապարհով է մտել Հայաստան, կա՛մ մինչև 25 կամ 50 կգ անհատական անմաքս ներկրման շրջանակներում»,– ասել է Ավետիսյանը։
Նշենք, որ խոսքը իտալական «Ferrero SpA» ընկերության արտադրության «Ռաֆաելլո» և «Ֆեռերո Ռոշեր» կոնֆետերի մասին է, որոնք, սակայն, Հայաստան են ներկրել ոչ թե «Ferrero SpA»–ի պաշտոնական ներկայացուցիչ հայկական ընկերության, այլ, ինչ-որ անհասկանալի կազմակերպության կողմից։
