Հայաստանի ոստիկանության կողմից բերման է ենթարկվել Հայաստանում գտնվող, թմրանյութերի ապօրինի շրջանառության մեջ կասկածվող Միխայել Բրուդիանին: Հայաստանի ոստիկանության հասարակայնության հետ կապի եւ լրատվության վարչությունից հայտնում են, որ Հայաստանի ոստիկանության օպերատիվ տվյալների համաձայն` Վրաստանի քաղաքացի Բրուդիանին ապօրինի ձեռք էր բերել մետանֆիտամին, կոկային եւ սփայս տեսակի թմրամիջոցներ: Քրեական հետախույզները կասկածյալին մայրաքաղաքի Դավիթ Անհաղթի փողոցից բերման են ենթակել Ոստիկանության Քանաքեռ-Զեյթունի բաժին: Բերման ենթարկվածի անձնական խուզարկությամբ հայտնաբերվել է մետանֆիտամին թմրամիջոցին նմանվող բյուրեղանման զանգվածներով 6 փաթեթ, կոկայինին նմանվող սպիտակ փոշենման զանգվածով մեկ փաթեթ, սփայսի նմանվող զանգվածներով 9 փաթեթ եւ 25 սմ երկարությամբ դանակ: Հայտնաբերվածներն ուղարկվել է Ոստիկանության փորձաքրեագիտական վարչություն: Նշանակվել են դատաքիմիական, տոքսիկաքիմիական ,դատաքրեագիտական փորձաքննություններ: 37-ամյա Մախաել Բրուդիանին ձերբակալվել է: