Թրամփը հոգ է տանում Ամերիկայի, իսկ ես՝ Իսրայելի շահերի մասին. Նեթանյահու

Իսրայելի վարչապետ Բենիամին Նեթանյահուն հարցազրույցում անդրադարձել է ԱՄՆ նախագահ Դոնալդ Թրամփի հետ հարաբերություններին և Մերձավոր Արևելքում ստեղծված անվտանգային իրավիճակին։

Նեթանյահուն հերքել է այն պնդումները, թե Թրամփը գործում է իր հայտարարություններին հակառակ, և ընդգծել, որ յուրաքանչյուր առաջնորդ առաջնորդվում է իր երկրի շահերով։

«Նա հոգ է տանում Ամերիկայի շահերի մասին, իսկ ես՝ Իսրայելի շահերի մասին։ Եվ չեմ ամաչում ասել այն, ինչ մտածում եմ»,- հայտարարել է վարչապետը։

Նրա խոսքով՝ ԱՄՆ նախագահի հետ քննարկումների ընթացքում ինքը բացահայտ ներկայացնում է իր դիրքորոշումը, այդ թվում՝ Թուրքիայի և նախագահ Ռեջեփ Թայիփ Էրդողանի քաղաքականության վերաբերյալ։

Նեթանյահուն անդրադարձել է նաև Իսրայելի հյուսիսային սահմանին տիրող իրավիճակին՝ ընդգծելով, որ հարավային Լիբանանում անվտանգության գոտին պետք է պահպանվի։

Վարչապետի խոսքով՝ իր և Թրամփի միջև երկխոսությունը լիովին անկեղծ մթնոլորտում է ընթանում։ Միաժամանակ Նեթանյահուն բարձր է գնահատել ԱՄՆ ներկայիս վարչակազմի աջակցությունը:

«Նույնիսկ եթե որոշ հարցերում տարաձայնություններ ունենք, ես շատ բարձր եմ գնահատում նրա աջակցությունը։ Չեմ կարծում, որ Իսրայելի պատմության ընթացքում եղել է որևէ նախագահ, որն այնքան աջակցած լինի մեզ, որքան նա»։,- նշել է նա:

Անդրադառնալով Պարսից ծոցում վերջին լարվածությանը՝ Նեթանյահուն նշել է, որ դեռ վաղ է եզրակացություններ անել իրավիճակի հետագա զարգացման վերաբերյալ։

Նրա խոսքով՝ Վաշինգտոնի արձագանքը վկայում է, որ Թրամփը հիասթափված է Իրանի վարքագծից։

«Սա ցույց է տալիս, որ նա մեծ հիասթափություն է ապրում, քանի որ իրանցիները ժամանակ են ձգձգում։ Նրանք հենց դա էլ անում են, և նա դա հասկանում է»,- ասել է Նեթանյահուն։

Խոսելով տարածաշրջանային հնարավոր սրացման հետևանքների մասին՝ Իսրայելի վարչապետը նշել է, որ պատրաստ են ցանկացած սցենարի: