«Արարատցեմենտ»-ից մինչև «Մուլտի գրուպ»․ դատախազությունը Գագիկ Ծառուկյանի ընկերություններից պահանջում է գույքերի վերադարձ

Արարատի մարզի դատախազությունը 2026թ. հունիսի 23-ին հայցադիմում է ներկայացրել Հակակոռուպցիոն դատարան՝ ընդդեմ «Արարատցեմենտ» ՓԲԸ-ի։ Պահանջվում է ընկերությանը սեփականության իրավունքով պատկանող «Ոսկե բանալի» պրոֆիլակտորիայի (առողջարան) անշարժ գույքի վրա տարածել բռնագանձում։ Անշարժ գույքը գտնվում է Արարատ քաղաքի Շահումյան 5 հասցեում։

Դատախազությունը հայց է ներկայացրել նաև Գագիկ Ծառուկյանին պատկանող այլ գույքերի վերաբերյալ։

Հայցադիմումը մակագրվել է դատավոր Նարինե Ավագյանին, և դեռևս վարույթ ընդունելու հարցը որոշված չէ։

Նույն օրը Գլխավոր դատախազությունն էլ հայցադիմում է ներկայացրել Գագիկ Ծառուկյանի, նրա կողմից վերահսկվող «Մուլտի գրուպ կոնցեռն» ՍՊԸ-ի, «Բեղլու» ՓԲԸ-ի, «Սևան» ազգային պարկ ՊՈԱԿ-ի, ինչպես նաև Պետական գույքի կառավարման կոմիտեի դեմ։ Հայցով պահանջվում է անվավեր ճանաչել սեփականաշնորհման պայմանագիրը, անշարժ գույքի առուվաճառքի և հողամասի վարձակալության պայմանագրերը, ինչպես նաև գույքերը վերադարձնել պետության տնօրինմանը։

Թե կոնկրետ որ գույքերի մասին է խոսքը, «Դատալեքս» տեղեկատվական համակարգում մանրամասներ չկան։

Այս գործը մակագրվել է դատավոր Ռուդոլֆ Ավագյանին և նույնպես դեռևս վարույթ ընդունված չէ։

Դատախազությունն ավելի վաղ՝ 2026թ. հունիսի 8-ին, հայտնել էր, որ «Արարատցեմենտ» ընկերությանը պատկանող «Ոսկե բանալի» առողջարանի ձեռքբերման գործընթացում հայտնաբերել է մի շարք խախտումներ։ 

Այս մասին հայտնում է Հետքը՝ https://hetq.am/hy/article/182244