ՌԴ-ից բացահայտ ակնարկներ․ Մոսկվան կօգնի Ադրբեջանին

Մենք պատրաստ ենք նպաստել Ադրբեջանի անդամակցությանն ԵԱՏՄ-ին, հայտարարել ՌԴ ԱԳ նախարարի ԱՊՀ հարցերով տեղակալ Միխայիլ Գալուզինը։

«Ապրիլին Զանգիլանում կայացած հանդիպումից հետո պատրաստվել է միջոցառումների ցանկ՝ առևտրաշրջանառությունը մեծացնելու և արդյունաբերության մեջ ինստիտուցիոնալ համագործակցությունը զարգացնելու համար։ Սահմանվել են ռուսական բիզնեսի համար հնարավորություններ՝ մասնակցելու Ղարաբաղում և Արևելյան Զանգեզուրի շրջաններում վերակառուցման նախագծերին։ Ռուսաստանը հետաքրքրված է Ադրբեջանին Եվրասիական տնտեսական միությանը մերձեցնելով»,- ասել է նա։

Գալուզինը նաև հայտարարել է, որ Ռուսաստանը աջակցում է Ադրբեջանի և Հայաստանի ջանքերին՝ ուղղված հարաբերությունների լիակատար և համապարփակ կարգավորմանը։

«Մենք, ինչպես նախկինում, պատրաստ ենք օգնել Բաքվին և Երևանին տրանսպորտային և տնտեսական հաղորդակցությունների ապաշրջափակման, մարդասիրական հարցերի լուծման գործում և պատրաստ ենք ռուսական հարթակ տրամադրել խաղաղության պայմանագրի ստորագրման համար»,- ասել է ՌԴ ԱԳ նախարարի ԱՊՀ հարցերով տեղակալ Միխայիլ Գալուզինը։