Իրավիճակը զգալիորեն բարդացել է. Պուտին

Աշխարհում իրավիճակը զգալիորեն բարդացել է, անկայունության նոր օջախներ են հայտնվել այդ թվում ԱՊՀ երկրների սահմանների մոտ։ Այս մասին ասված է ՌԴ նախագահ Վլադիմիր Պուտինի ուղերձում՝ ուղղված ԱՊՀ երկրների անվտանգության մարմինների և հատուկ ծառայությունների ղեկավարների խորհրդի 58-րդ նիստի մասնակիցներին։

«Այսօր աշխարհում ռազմաքաղաքական իրավիճակը զգալիորեն բարդացել է։ Լուրջ ճգնաժամը համակել է Մերձավոր Արևելքը։ Անկայունության նոր օջախներ են հայտնվել այդ թվում մեր սահմանների մոտ։ Այս կապակցությամբ կարևոր է առավելագույնս օգտագործել ձեր կառույցների վերլուծական, կադրային, օպերատիվ, տեխնիկական հնարավորությունները՝ ողջ Համագործակցությունը պոտենցիալ ներքին և արտաքին սպառնալիքներից հուսալիորեն պաշտպանելու համար, կանոնավոր կերպով փոխանակել տեղեկատվություն, մշակել միասնական մոտեցումներ ընդհանուր խնդիրների լուծման գործում», - ասել է ռուսական պետության ղեկավարը։

Պուտինը նշել է, որ նիստում նախատեսվում է առարկայական քննարկել մասնագիտական հարցերի լայն շրջանակ։ Դրանց թվում են՝ ահաբեկչությանն ու ծայրահեղականությանը, անդրազգային կազմակերպված հանցավորությանը, կիբերհանցագործություններին և անվտանգության համակարգաստեղծ այլ սպառնալիքներին ավելի արդյունավետ հակազդումը։

«Վստահ եմ, որ նիստի արդյունքները կծառայեն մեր երկրների ու ժողովուրդների անվտանգ և կայուն զարգացման ապահովմանը։ Մաղթում եմ ձեզ արդյունավետ աշխատանք և հաջողություններ», - եզրափակել է ՌԴ նախագահը։