14:00 Լուրերը մեկ տողով. Հայաստանը չի խզում կապը Ռուսաստանի հետ, Գյումրին Փաշինյանի հատուկ հսկողության տակ

Անցած ժամվա լուրերը՝ հակիրճ և բովանդակային.

• Արարատ Միրզոյանը հայտարարել է, որ աշխարհում ձևավորվող նոր առևտրային և լոգիստիկ շղթաներում Հայաստանը կարող է դառնալ առանցքային օղակ Արևմուտք-Արևելք ուղղությամբ։ Նրա խոսքով՝ Երևանը չի պատրաստվում բաց թողնել այդ հնարավորությունը և այժմ տարբեր գործընկերների, այդ թվում՝ Ռուսաստանի հետ քննարկում է հնարավոր համագործակցության տարբերակները։ 

• Արտաքին գործերի նախարար Արարատ Միրզոյանը նաև անդրադարձել է Ռուսաստանի Անվտանգության խորհրդի փոխնախագահ Դմիտրի Մեդվեդևի հայտարարությանը, ըստ որի՝ Նիկոլ Փաշինյանը փորձում է խզել հարաբերությունները Ռուսաստանի հետ։ Միրզոյանը հայտարարել է, որ այդ տեղեկությունները չեն համապատասխանում իրականությանը և Հայաստանը շահագրգռված չէ քաղաքական, տնտեսական կամ այլ կապերի խզմամբ։ 

• Ադրբեջանցի քաղաքագետ Ֆարհադ Մամեդովը մեկնաբանել է ԱՄՆ պետքարտուղար Մարկո Ռուբիոյի սպասվող այցը Հայաստան՝ այն կապելով առաջիկա խորհրդարանական ընտրությունների հետ։ Նրա կարծիքով՝ այցը ոչ միայն աջակցություն է Նիկոլ Փաշինյանի թիմին, այլ նաև ազդակ, որ Վաշինգտոնը մտադիր է պահպանել ակտիվ ներգրավվածությունը տարածաշրջանում։ 

• ԿԳՄՍ նախարարությունը հերքել է շրջանառվող տեղեկությունները, թե սեպտեմբերից Հայաստանում նախատեսվում են դպրոցների փակումներ կամ միավորումներ։ Factor.am-ի հետ զրույցում նախարարությունից նշել են, որ նման որոշման նախագիծ գոյություն չունի։ Արտամետի Գուրգեն Մարգարյանի անվան ավագ դպրոցի փակման մասին լուրերը ևս պաշտոնապես հերքվել են, և հայտարարվել է, որ դպրոցը շարունակելու է գործել։

• Վարչապետ Նիկոլ Փաշինյանը Գյումրի կատարած այցի ընթացքում հանդիպել է բնակիչների հետ և խոսել քաղաքի խնդիրների մասին։ Փաշինյանը հայտարարել է, որ առաջիկա հինգ տարիներին քաղաքը լինելու է իր անձնական ուշադրության կենտրոնում, իսկ կառավարությունը տարեկան շուրջ 25 կմ ճանապարհ է վերանորոգելու։

• Financial Times-ը հայտնել է, որ Մերձավոր Արևելքում շարունակվող հակամարտության ֆոնին ԱՄՆ-ում զգալիորեն աճել են վառելիքի և սննդամթերքի գները։ Ամերիկացիների ծախսերը բենզինի համար նախորդ տարվա համեմատ աճել են գրեթե 40 տոկոսով, իսկ գնաճը շարունակում է գերազանցել աշխատավարձերի աճը։ Արդյունքում նվազում են բնակչության իրական եկամուտները, իսկ հատկապես թանկացել են սննդամթերքն ու գյուղմթերքը։

• Իրանի ԱԳՆ խոսնակ Էսմայիլ Բաղային հայտարարել է, որ ԱՄՆ-ի հետ բանակցություններում մի շարք հարցերի շուրջ արդեն որոշակի եզրահանգումների են հասել, սակայն դա դեռ չի նշանակում մոտ ապագայում համաձայնագրի ստորագրում։ Թեհրանը շարունակում է պնդել, որ այժմ բանակցությունների հիմնական թեման պատերազմի ավարտն է, ոչ թե միջուկային ծրագիրը։