13:00 Լուրերը մեկ տողով. Կարապետյանի՝ «Սաֆարովի կանխարգելման օրենքը», ընտրակաշառքի նոր գործ

Անցած ժամվա լուրերը՝ հակիրճ և բովանդակային.

·  Իրավապահ մարմինները խուզարկություններ են իրականացրել Ավանում գտնվող «Ուժեղ Հայաստան» կուսակցության գրասենյակներում և կուսակցության աջակիցների բնակարաններում։ Հակակոռուպցիոն կոմիտեի փոխանցմամբ՝ գործողությունները կապված են ընտրակաշառք տալու և ստանալու դեպքերի առթիվ նախաձեռնված քրեական վարույթի հետ։ Կոմիտեն հաստատել է, որ արդեն ձերբակալվել է հինգ մարդ, իսկ անհրաժեշտության դեպքում լրացուցիչ տեղեկություն կտրամադրվի։ 

·  «Ուժեղ Հայաստան» կուսակցության առաջնորդ Սամվել Կարապետյանը հայտարարել է, որ եթե չկանխվի, իր ձևակերպմամբ, Փաշինյանի և Ալիևի ծրագրած 300 հազար ադրբեջանցիների մուտքը Հայաստան, ապա երկրի տնտեսական ծրագրերը կկորցնեն արդյունավետությունը։ Նրա խոսքով՝ կուսակցությունը նախատեսում է ընդունել «Սաֆարովի կանխարգելման» օրենք, որով ադրբեջանցիներին կարգելվի Հայաստանում հող և անշարժ գույք ձեռք բերել կամ նվեր ստանալ։ Կարապետյանը նշել է, որ երկրի անվտանգության հարցը առաջնային է և առանց դրա տնտեսական զարգացումը չի ունենա արժեք։ 

·  300 հազար ադրբեջանցիների թեմայով լրագրողները հարցեր են ուղղել նաև արտգործնախարար Արարատ Միրզոյանին։ Նա անդրադարձել է նաև ԱՄՆ պետքարտուղար Ռուբիոյի սպասվող այցին՝ նշելով, որ դրա օրակարգի մասին կհայտարարվի ավելի ուշ։ Իշխանություններին աջակցելու վերաբերյալ հարցին Միրզոյանը արձագանքել է՝ հակադարձելով լրագրողներին, թե արդյոք նրանք վախենում են նման աջակցությունից։ 

·  «Միասնության թևեր» կուսակցության վարչապետի թեկնածու Արման Թաթոյանը հայտարարել է, որ երեխա մեծացնելու պատճառով աշխատանքից դուրս մնացած մայրերի տարիները պետք է հաշվարկվեն որպես աշխատանքային ստաժ։ Նրա խոսքով՝ այդ տարիները պետք է ամրագրվեն աշխատանքային գրքույկում և հետագայում հաշվի առնվեն աշխատանքի ընդունվելու, աշխատավարձի, թոշակի և սոցիալական իրավունքների ձևավորման ընթացքում։ Թաթոյանը նշել է, որ պետությունը պարտավոր է արդար մոտեցում ցուցաբերել մայրերի նկատմամբ։ 

·  Գյումրիում փողոցային առևտրով զբաղվող քաղաքացին Նիկոլ Փաշինյանի հետ զրույցում դժգոհել է, որ պետական մարմինները իր գործունեությունը համարել են ապօրինի, առգրավել ապրանքը և չեն վերադարձրել վճարված հարկերը։ Քաղաքացին նշել է, որ դատարանի որոշումը ևս չի կատարվում։ Փաշինյանը զարմանք է հայտնել դատարանի ակտի չկատարման առնչությամբ և առաջարկել ներկայացնել փաստաթղթերը։ Նա նշել է, որ անհրաժեշտ է ստեղծել համապատասխան շուկայական պայմաններ, սակայն դրանից հետո փողոցային առևտուրը պետք է դադարեցվի։ Քննարկման ընթացքում անդրադարձ է եղել նաև Գյումրիի հին շուկայի տարածքին և «Թումո» կենտրոնի ծրագրերին։ 

·  Իտալիայի արտգործնախարար Անտոնիո Տայանին կոչ է արել Եվրամիությանը պատժամիջոցներ կիրառել Իսրայելի ներքին անվտանգության նախարար Իտամար Բեն-Գվիրի նկատմամբ։ Պատճառը Գազա ուղևորվող նավատորմի ակտիվիստների նկատմամբ վերաբերմունքն է, որը Հռոմում գնահատում են որպես մարդու իրավունքների խախտում։ Իտալիայի իշխանությունները հայտարարել են, որ ակտիվիստների նկատմամբ նման վերաբերմունքը անընդունելի է և հակասում է մարդկային արժանապատվությանը։ 

·  ԵՄ արտաքին քաղաքականության ղեկավար Կայա Կալասը Ռուսաստանի վերջին հարվածներն Ուկրաինային բնութագրել է որպես «միջուկային զենքի ցնցում»։ Նա նշել է, որ Ռուսաստանը մարտադաշտում փակուղի մտնելու պատճառով փորձում է ահաբեկել Ուկրաինայի խաղաղ բնակչությանը՝ հարվածներ հասցնելով քաղաքների կենտրոններին։ Կալասի խոսքով՝ «Օրեշնիկ» բալիստիկ հրթիռի կիրառումը քաղաքական սպառնալիք է և միջուկային շանտաժի դրսևորում։