Խուզարկություններ` Մակրոնի նստավայրում

Ելիսեյան պալատը՝ Ֆրանսիայի նախագահի պաշտոնական նստավայրը, դարձել է լայնամասշտաբ խուզարկությունների վայր, հաղորդում է ԱՖՊ-ն։

Գործողությունն իրականացրել է Ազգային ֆինանսական դատախազությունը (PNF)՝ հեղինակավոր պետական արարողությունների կազմակերպման ժամանակ կոռուպցիայի, հովանավորչության և ֆինանսական չարաշահումների վերաբերյալ գործի շրջանակներում։

Հետաքննության կենտրոնում է Shortcut Events իվենթ-գործակալությունը։ Քննությունը կարծում է, որ ավելի քան 20 տարի շարունակ (2002-ից մինչև 2024 թվականը) ընկերությունը Ելիսեյան պալատից ստացել է բացառիկ պայմանագրեր՝ շրջանցելով ցանկացած մրցութային ընթացակարգ։ Հենց այս ընկերությանն էին վստահում ամենազգայուն ազգային իրադարձությունները, ներառյալ մեծանուն ֆրանսիացիների աճյունների հանդիսավոր տեղափոխումը Պանթեոն։ Մեկ այսպիսի արարողության արժեքը, տեղական լրատվամիջոցների տեղեկություններով, հասնում էր 2 միլիոն եվրոյի։

Քննիչներին նախագահական նստավայր մուտք գործել հաջողվել է ոչ միանգամից։ Առաջին փորձը ապրիլի 14-ին արգելափակել էր նախագահի աշխատակազմը՝ հղում անելով Սահմանադրության 67-րդ հոդվածին, որը պաշտպանում է պետության ղեկավարի պաշտոնական նստավայրի անձեռնմխելիությունը։ Միայն մայիսի 21-ից հետո՝ մեկամսյա միջգերատեսչական համաձայնեցումներից հետո, PNF-ն վերջապես ստացել է փաստաթղթերի առգրավման թույլտվություն։

Ելիսեյան պալատից ԱՖՊ-ին պարզաբանել են, որ նախագահական աշխատակազմը թույլատրել է խուզարկությունը, քանի որ քննչական գործողությունները «անձնապես ուղղված չեն» Էմանուել Մակրոնի դեմ։ Ընդ որում, պահպանվել են բոլոր «անհրաժեշտ երաշխիքները» սահմանադրական նորմերի և «ազգային պաշտպանության գաղտնիության» սկզբունքի շրջանակներում։