13:00 Լուրերը մեկ տողով. Խստացվում են Green card ստանալու կանոնները, Թևանյանի դատը

Անցած ժամվա լուրերը՝ հակիրճ և բովանդակային. 

 • Ավան և Նոր Նորք վարչական շրջանների ընդհանուր իրավասության դատարանում սկսվել է «Մայր Հայաստան» կուսակցության նախագահ Անդրանիկ Թևանյանի խափանման միջոցի ընտրության նիստը։ Նրա աջակիցները հավաքվել էին դատարանի բակում, իսկ պաշտպանական կողմը հայտարարել է, որ պետական դավաճանության և լրտեսության հոդվածներով առաջադրված մեղադրանքները որևէ հիմնավորում չունեն։

• Հակակոռուպցիոն կոմիտեն տեղեկացրել է, որ ընտրակաշառքի, դրա ստացման և բարեգործության արգելքի խախտումների վերաբերյալ քննվող գործերով վերջին երկու օրում ձերբակալվել է 21 անձ։ Նրանցից 13-ի նկատմամբ արդեն կիրառվել է կալանք որպես խափանման միջոց։

• ԱՄՆ պետքարտուղար Մարկո Ռուբիոն հայտարարել է, որ մի շարք երկրների ղեկավարներ պատրաստակամություն են հայտնել միանալ Իրանի դեմ ռազմական գործողություններին, եթե իրավիճակը տարածաշրջանում կրկին սրվի։ Միաժամանակ Վաշինգտոնը շարունակում է հայտարարել, որ նախընտրում է հարցը լուծել դիվանագիտական ճանապարհով։

• Միջուկային զենքի չտարածման պայմանագրի վերանայման համաժողովը երրորդ անգամ անընդմեջ ավարտվել է առանց ամփոփիչ փաստաթղթի ընդունման։ Իրանը մեղադրել է ԱՄՆ-ին և նրա դաշնակիցներին գործընթացը խոչընդոտելու մեջ և հայտարարել, որ առանց միջուկային զինաթափման հնարավոր չէ պատկերացնել պայմանագրի ապագան։

• Եվրամիության խորհուրդը հաստատել է Իրանի դեմ նոր պատժամիջոցների կիրառման մեխանիզմ՝ կապված Հորմուզի նեղուցում նավագնացության ազատության խախտումների հետ։ Սահմանափակումները նախատեսում են մուտքի արգելքներ, տարանցման սահմանափակումներ և ակտիվների սառեցում այն անձանց ու կազմակերպությունների նկատմամբ, որոնք առնչություն ունեն այդ գործողություններին։

• ԱՄՆ-ում մեղադրանք է առաջադրվել Իրաքից արտահանձնված «Կատաիբ Հեզբոլլահ» խմբավորման հրամանատարին, որը կասկածվում է Իվանկա Թրամփի դեմ մահափորձ ծրագրելու և ԱՄՆ-ի ու Եվրոպայի տարբեր տարածքներում ահաբեկչական գործողություններ կազմակերպելու մեջ։ Հաղորդվում է, որ նրա մոտ հայտնաբերվել են Թրամփի ընտանիքի տան հատակագծեր և սպառնալիքներ պարունակող նյութեր։

• Թրամփի վարչակազմը խստացրել է գրին քարտերի տրամադրման կանոնները՝ սահմանելով, որ դիմորդների մեծ մասը պետք է փաստաթղթերը ներկայացնի ԱՄՆ-ից դուրս գտնվելիս։ Վաշինգտոնը դա ներկայացնում է որպես անօրինական միգրացիայի դեմ պայքարի և ներգաղթի վերահսկողության ուժեղացման հերթական քայլ։