Իվետա Տոնոյանն անդրադարձել է ԲՀԿ-ին ուղղված մեղադրանքներին

Ծառուկյանի մամուլի խոսնակը ստահոդ և մանիպուլյատիվ է որակել ԲՀԿ-ի նկատմամբ արտաքին միջամտությունների վերաբերյալ պնդումները։

Մամլո ասուլիսի ընթացքում Իվետա Տոնոյանը, պատասխանելով լրագրողների հարցին, նշել է, որ ԲՀԿ-ի հասցեին հնչող մեղադրանքները՝ Ռուսաստանի և Բելառուսի կողմից արտաքին միջամտությունների մասին, դասվում են քարոզչական դաշտ նետվող ստահոդ լուրերի շարքին։

«Առ այս պահը միակ քաղաքական ուժը, որին աջակցել են այլ երկների տարբեր ներկայացուցիչներ, նախագահներ, չինովնիկներ և այլն, դա «Քաղաքացիական պայմանագիր» կուսակցությունն է, որին իրենց հաստատուն աջակցությունը պարբերաբար հայտնում են Թուրքիայի և Ադրբեջանի իշխանությունները: Որևէ դեպքում ԲՀԿ-ին որևէ արտաքին ուժ, կամ օտարերկրյա պետություն աջակցություն չի հայտնել: Այս գործընթացում շանտաժի լեզվով ժովովրդի հետ խոսելու ունակության առումով իշխանությունները մրցակից չունեն, սակայն մեր հայրենակիցները առավել քան հասկանում են, թե ինչի մասին է խոսքը: Նույն պատերազմը սկսվել է այս իշխանության օրոք, հազարավոր տղաներ հաշմանդամություն ստացել են իրենց օրոք, Արցախը հանձնվել է իրենց օրոք, 120,000 հայրենակիցներ զրկվել են իրենց հայրենիքից այս իշխանությունների օրոք: Պատերազմի կուսակցությունը վստահաբար ընդդիմության ներկայացուցիչները չեն, այլ հենց իշխանությունն է»,- ընդգծել է խոսնակը: