Արաղչին նախազգուշացրել է Իսրայելի հետ համագործակցող երկրներին

Իրանի արտաքին գործերի նախարար Աբբաս Արաղչին հայտարարել է, որ Իսրայելի հետ դավադրության մեջ մտնող պետությունները պատասխանատվության կենթարկվեն։

Իրանի արտգործնախարարն իր X սոցցանցի էջում գրառում է կատարել՝ նշելով, որ Իրանի մեծ ազգի նկատմամբ թշնամանքը հիմար արկածախնդրություն է, իսկ Իսրայելի հետ դավադրությունը՝ աններելի։ Ըստ Արաղչիի՝ բոլոր նրանք, ովքեր դավադրության մեջ են մտնում Իսրայելի հետ, պատասխանատվություն են կրելու։

Արտգործնախարարը հավելել է, որ Իսրայելի վարչապետ Բենիամին Նեթանյահուն հրապարակավ բացահայտել է այն տեղեկությունները, որոնք Իրանի անվտանգության ծառայությունները վաղուց էին փոխանցել երկրի ղեկավարությանը։

Ավելի վաղ Իսրայելի վարչապետի գրասենյակը տեղեկություն էր տարածել, որ Բենիամին Նեթանյահուն գաղտնի այց է կատարել ԱՄԷ և հանդիպել նախագահ շեյխ Մուհամեդ բին Զայեդի հետ։ Իսրայելական կողմն այդ այցը որակել է որպես «պատմական բեկում» երկու պետությունների հարաբերություններում, սակայն չի հստակեցրել այցի ստույգ ժամկետը։