Մարդիկ ճիշտ երազանքներ ունեին, կատարողին սխալ ընտրեցին. Նարեկ Կարապետյան

«Ուժեղ Հայաստան» կուսակցության խորհրդի անդամ Նարեկ Կարապետյանը «Սյունյաց երկրին» տված հարցազրույցում անդրադարձել է հեղափոխությանը և առաջիկա ընտրություններին։

Հեղափոխության ժամանակ մարդիկ ունեցել են ճիշտ երազանքներ և ձգտել են փոփոխությունների, սակայն, ըստ Նարեկ Կարապետյանի, ընտրվել է սխալ կատարող։ Նա նշել է, որ խնդիրը ոչ թե երազանքների, այլ հենց իրականացնողի մեջ էր։

«Այս մարդը չկարողացավ ապահովել այդ թիմայնությունը, որովհետև նա թիմային գործիչ չէ, նա միանձնյա որոշում կայացնող է, ով ուզուրպացնում է ամբողջ իշխանությունը՝ թույլ չտալով ակտիվ գործիչներին Հայաստանում տեղ ունենալ»,- ասել է բանախոսը։

Անդրադառնալով սպասվող խորհրդարանական ընտրություններին՝ Կարապետյանը շեշտել է, որ դրանք վճռորոշ նշանակություն ունեն պետության առաջիկա 30-40 տարիների զարգացման տեսանկյունից։ Նրա խոսքով՝ թեև տարիներ անց երկիրը կարող են այլ ղեկավարներ առաջնորդել, սակայն ներկա պահը որոշիչ է զարգացման և ապագա մարտահրավերների դիմակայման համար։