Եվս մեկ էական քայլ է իրականացվել. Սերդար Քըլըչ

Թուրքիայում Հայաստանի հետ հարաբերությունների կարգավորման հարցերով հատուկ ներկայացուցիչ Սերդար Քըլըչն անդրադարձել է երկու երկրների միջև երկկողմ առևտրի սահմանափակումների վերացմանը։

X-ի իր էջում Սերդար Քըլըչը նշել է, որ տարածաշրջանում կայունության և տևական խաղաղության հաստատման ուղղությամբ ևս մեկ էական քայլ է իրականացվել։ Ըստ նրա՝ Թուրքիայի նախագահի հրահանգներով իրականացվող կարգավորման գործընթացի շրջանակներում կատարված այս քայլը նպատակ ունի բարենպաստ պայմաններ ստեղծել երկու երկրների ժողովուրդների, ինչպես նաև տարածաշրջանի բոլոր ժողովուրդների ու գործարարների համար։

Հիշեցնենք, որ նոր կարգավորման ուժի մեջ մտնելուց հետո հնարավորություն է ստեղծվել, որ Թուրքիայից երրորդ երկրների տարածքով Հայաստան տեղափոխվող կամ հակառակ ուղղությամբ փոխադրվող ապրանքների համար որպես ելքի կամ վերջնական նշանակման կետ նշվի «Հայաստան/Թուրքիա»։