Նախկին-ներկան քաղցկեղի նման կպած են. Փաշինյան

Շենգավիթում ընթացող քարոզարշավի ժամանակ Նիկոլ Փաշինյանը խոստովանել է, որ իրեն չի հաջողվում ձերբազատվել «նախկին-ներկա» հռետորաբանությունից։

Ելույթի ընթացքում նա նշել է, որ նախկին իշխանավորներն ու նրանց հետ կապված օլիգարխները, այդ թվում՝ Սերժ Սարգսյանը, Ռոբերտ Քոչարյանը, Լևոն Տեր-Պետրոսյանն ու այլոք, «քաղցկեղի նման» կպած են իրականությանը։ Ըստ Փաշինյանի՝ նրանցից ազատվելու միակ տարբերակը վիրահատական միջամտությամբ հեռացնելն է, և պետք է ընթանալ հենց այդ ճանապարհով։

«Չի ստացվում, ժողովո՛ւրդ, էդ նախկին-ներկան՝ Սերժը, Ռոբը, Լևոնը, իրենց օլիգարխները, էն բելառուսցի օլիգարխը՝ անունը Գագո է, էն մյուսը, դրանք քաղցկեղի նման կպած են, դրանց վիրահատական եղանակով պետք է մեր իրականությունից կտրել-հեռացնել, այլ կերպ չի ստացվում, պետք է գնալ այդ ճանապարհով»,- հայտարարել է նա։

Բացի այդ, Փաշինյանը հորդորել է չերազել այլ հայրենիքի մասին՝ պնդելով, որ երազանքների հայրենիքն արդեն իսկ գտնված է։ Նա ընդգծել է, որ այդ հայրենիքը Հայաստանի Հանրապետությունն է։