Բրյուսելը կաջակցի Հայաստանին՝ ԵՄ անդամ դառնալու հարցում

Եվրահանձնակատար Մարտա Կոսը հայտարարել է, որ Եվրամիությունը նեցուկ կլինի ԵՄ անդամ դառնալու Հայաստանի նպատակին։

Բրյուսելում ընդլայնման հարցերով եվրահանձնակատարը նշել է, որ Եվրոպական քաղաքական համայնքի հանդիպումն ու ԵՄ-Հայաստան գագաթնաժողովը հստակեցրել են Երևանի ընտրած ուղին, և Եվրոպան պատրաստ է աջակցել դրանում։ Այս հայտարարությունը հաջորդել է հանրապետության՝ ԵՄ-ին ու ԵԱՏՄ-ին անդամակցելու վերաբերյալ վերջին քննարկումներին։

Ռուսաստանի նախագահ Վլադիմիր Պուտինը նախորդ շաբաթ օրը կայացած մամուլի ասուլիսի ընթացքում առաջարկել է ԵԱՏՄ հերթական գագաթնաժողովի օրակարգում ներառել Եվրամիության հետ կապված Հայաստանի ծրագրերի հարցը։

Հայաստանի վարչապետ Նիկոլ Փաշինյանը բազմիցս շեշտել է Եվրամիության անդամ դառնալու ձգտումը՝ հավելելով, որ դրա համար անհրաժեշտ է համապատասխանել սահմանված չափանիշներին։ Սակայն ապրիլի 1-ին Փաշինյանի հետ ունեցած բանակցությունների ժամանակ Պուտինը նկատել է, որ ԵՄ-ի և ԵԱՏՄ-ի հետ միաժամանակ նույն մաքսային միության մեջ լինելն ի սկզբանե անհնար է՝ որակելով դա որպես տնտեսական հարց։

ՌԴ նախագահի խոսքով՝ Երևանի համար ճիշտ կլիներ հանրաքվե անցկացնել Եվրամիության հետ համագործակցության զարգացման շուրջ՝ հաշվի առնելով սեփական քաղաքացիների և Ռուսաստանի՝ որպես հիմնական տնտեսական գործընկերոջ շահերը։ Նա նշել է, որ նման պարագայում Ռուսաստանը կաներ հետևություններ և կընտրեր «մեղմ, ինտելիգենտ և փոխշահավետ ամուսնալուծության» տարբերակը։