Ուկրաինայից Սահակաշվիլիի հետ կապված հայտարարություն են արել

Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը հայտարարել է, որ Վրաստանի հեղինակության համար առանցքային է Սահակաշվիլիի տեղափոխումն Ուկրաինա կամ երրորդ երկիր։

«Պիրվելի» հեռուստաալիքին տված հարցազրույցում Միխայիլ Պոդոլյակը շեշտել է, որ որպես ինքնիշխան պետություն՝ Վրաստանի համար կարևոր է Միխեիլ Սահակաշվիլիի կողմից քրեակատարողական հիմնարկը լքելը։ Ըստ նրա՝ անհրաժեշտ է, որ նախկին նախագահը վերադառնա Ուկրաինա կամ տեղափոխվի չեզոք երրորդ երկիր։

Պոդոլյակը նշել է, որ Սահակաշվիլին Ուկրաինայի քաղաքացի է, ինչն այդ հարցը առաջնահերթ է դարձնում իրենց համար։ Նա հորդորել է տեղեկատվական դաշտում առկա լարվածության փոխարեն հնարավորություն գտնել փոխադարձ հարգանքի վրա հիմնված երկխոսության համար։ Խորհրդականի խոսքով՝ Կիևը շահագրգռված է գործընկերների հետ հարաբերությունների խորացմամբ։

Հումանիտար և պատմական տեսանկյունից Պոդոլյակն առաջարկել է միջանկյալ լուծում, որի դեպքում Սահակաշվիլին կտեղափոխվի չեզոք երկիր՝ տևական բուժում ստանալու նպատակով։ Նա հավելել է, որ Սահակաշվիլիի կալանավորումը ոչ թե Վրաստանի, այլ Ռուսաստանի և անձամբ Պուտինի խնդիրն է, ով ագրեսիվ է իր ընդդիմախոսների նկատմամբ։

Ըստ Պոդոլյակի՝ Սահակաշվիլիին ազատ արձակելու քայլը թույլ կտա Վրաստանին զերծ մնալ այս խնդրից և կնպաստի Ուկրաինայի ու եվրոպական երկրների հետ հարաբերությունների ջերմացմանը։