13:00 Լուրերը մեկ տողով. Փաշինյանի դժգոհությունը, Կարապետյանի վստահությունը և Օհանյանի մեղադրանքները

Անցած ժամվա լուրերը՝ հակիրճ և բովանդակային.

 • Կառավարության նիստում Նիկոլ Փաշինյանը քննադատել է Երևանի և Գյումրիի ճանապարհների վիճակը՝ դա կապելով տեղական իշխանությունների ու կառավարության միջև համագործակցության բացակայության հետ։ Նա հայտարարել է, որ այս տարվանից նախատեսվում է նաև Երևանի ճանապարհների վերանորոգման առանձին ծրագիր, իսկ Գյումրիում շարունակվելու են ներդրումները։

• «Ուժեղ Հայաստան» կուսակցության վարչապետի թեկնածու Սամվել Կարապետյանը հայտարարել է, որ ընտրություններից հետո ինքն է լինելու վարչապետը և իր թիմը գնում է բացարձակ հաղթանակի։ Նա նաև անդրադարձել է հետընտրական հնարավոր զարգացումներին՝ նշելով, որ պատրաստ են ցանկացած քայլի։

• ԱԺ-ում Սեյրան Օհանյանը հայտարարել է, որ 44-օրյա պատերազմի պատասխանատվությունը միայն բանակի վրա դնելը սխալ է, և մեղավոր են իշխանության բոլոր թևերը։ Նրա խոսքով՝ ռազմաքաղաքական որոշումների ձախողումն է հանգեցրել ծանր հետևանքների։

• Գլխավոր դատախազ Աննա Վարդապետյանը հայտարարել է, որ ընդդիմադիրների մեղադրանքների ֆոնին առկա է ապօրինի ծագման գույքի բռնագանձման գործընթաց։ Նա նաև կոչ է արել հրապարակային հայտարարությունները ներկայացնել իրավապահ մարմիններին պաշտոնական ցուցմունքի ձևով։

• Սերբիայի նախագահ Ալեքսանդր Վուչիչը հայտարարել է, որ պատրաստվում է լայնածավալ պետական բարեփոխումների, ներառյալ կառավարության և պետական ապարատի կրճատումը։ Նրա խոսքով՝ նախատեսվում է նաև լուծարել մի շարք կառույցներ, որոնք արդյունավետ գործունեություն չեն ծավալում։