ՏԵՍԱՆՅՈՒԹ. Պատերազմի հավանականությունը կմեծանա. Քրիստինե Գրիգորյանը` ընդդիմության առաջարկների մասին

Արտաքին հետախուզության ծառայության պետը հայտարարել է, որ «Հայաստան» դաշինքի առաջարկների իրագործումը կարող է հանգեցնել լայնամասշտաբ պատերազմի վտանգի աճին։

Ազգային ժողովի նիստի ժամանակ Արտաքին հետախուզության ծառայության պետ Քրիստինե Գրիգորյանը, պատասխանելով «Հայաստան» խմբակցության պատգամավոր Արմենուհի Կյուրեղյանին, անդրադարձել է իշխանափոխության հնարավոր հետևանքներին։ Նա նշել է, որ եթե «Հայաստան» դաշինքը կամ նմանատիպ մոտեցումներ ունեցող որևէ այլ ուժ ստանձնի իշխանությունը և կատարի իր խոստումները, ապա լայնամասշտաբ պատերազմի հավանականությունը կմեծանա։

Արձագանքելով ԱԺ փոխնախագահ Ռուբեն Ռուբինյանի հարցին՝ Գրիգորյանը պարզաբանել է իրավիճակը։ Ռուբինյանը նշել էր, որ դաշինքի ներկայացուցիչները դեմ են Հայաստանի տարածքը 29,743 կմ քառակուսիով սահմանափակելուն և սահմանազատման հիմքում Ալմաթայի հռչակագիրը դնելուն՝ առաջ քաշելով այլ, մասնավորապես՝ էթնոգրաֆիական սկզբունքներ։

«Ըստ էության ձեր կողմից վկայակոչված հայտարարությունները ամենապարզ տրամաբանության պայմաններում խոսում են խաղաղության ճարտարապետությունը քանդելու և կոնֆլիկտին վերադառնալու մասին՝ դրանից բխող բոլոր հետևանքներով, այդ թվում նաև հարձակման սպառնալիքներով»,- ընդգծել է Քրիստինե Գրիգորյանը։