Իրանի դեսպանը պարզաբանել է՝ ինչու չի կայանում Փաշինյանի այցը երկիր

Հայաստանում Իրանի դեսպան Խալիլ Շիրղոլամին հայտնել է, որ ՀՀ վարչապետ Նիկոլ Փաշինյանի՝ Իրան պլանավորված այցի հստակ օրը դեռ որոշված չէ։ Այս մասին հայտնում է  Sputnik Արմենիան:

Դեռևս փետրվարին դիվանագետը նշել էր, որ 2026 թվականին նախատեսվող այցի շրջանակում կողմերը մտադիր են ստորագրել ռազմավարական համագործակցության փաստաթուղթ։

Դեսպանը պարզաբանել է, որ թեև այցի գաղափարը կար, սակայն հետագա իրադարձությունները, մասնավորապես՝ Իրանի դեմ պատերազմն ու ագրեսիային հակազդելու վրա երկրի կենտրոնացումը, հանգեցրել են որոշ ծրագրերի հետաձգման։

Եվրոպական քաղաքական համայնքի գագաթնաժողովի համատեքստում Շիրղոլամին հույս է հայտնել, որ Երևանը կկարողանա հավասարակշռված գործընկերություն ապահովել աշխարհաքաղաքական տարբեր կողմերի հետ՝ օգտագործելով իր ողջ ներուժը։ Դիվանագետը շեշտել է տարածաշրջանային բոլոր կողմերի շահերն ու մտահոգությունները հաշվի առնելու կարևորությունը և արժևորել կայունության ու փոխգործակցության ամրապնդումը տարածաշրջանում։