Հայտնի է` ինչ են քննարկել Ռուբինյանն ու Քըլըչը

«Երևանյան երկխոսություն» համաժողովի շրջանակներում հանդիպել են Հայաստանի և Թուրքիայի հարաբերությունների կարգավորման հատուկ ներկայացուցիչներ Ռուբեն Ռուբինյանն ու Սերդար Քըլըչը։

Կողմերը քննարկել են կարգավորման գործընթացում առկա առաջընթացը և դրական գնահատել Գյումրի-Կարս երկաթուղու վերականգնման ու գործարկման հարցերով համատեղ աշխատանքային խմբի վերջերս կայացած հանդիպումը։ Այս համատեքստում հատուկ ներկայացուցիչները շեշտել են երկու երկրների փոխադարձ հետաքրքրվածությունը երկաթուղու հնարավորինս արագ վերագործարկման հարցում։

Բացի այդ, պաշտոնյաներն անդրադարձել են պատմական Անիի (Մետաքսի ճանապարհի) կամրջի համատեղ վերականգնման արձանագրության ստորագրմանը։ Նրանք նշել են, որ այս նախաձեռնությունը կխթանի երկկողմ փոխգործակցությունը, կզարգացնի ինստիտուցիոնալ կապերը և էական նշանակություն կունենա տարածաշրջանային զբոսաշրջության զարգացման համար։