ՏԵՍԱՆՅՈՒԹ. Իսրայելը զանգվածային հարվածներ է հասցրել Լիբանանին

Իսրայելի պաշտպանության բանակը հայտարարել է, որ ավարտել է Լիբանանում «Հեզբոլլահի» ենթակառուցվածքների դեմ իրականացված ամենախոշոր հարվածային գործողությունը՝ «Մռնչացող առյուծ» օպերացիայի մեկնարկից ի վեր։

Ըստ պաշտոնական հաղորդագրության՝ հարվածները կատարվել են միաժամանակ տարբեր ուղղություններով՝ ընդգրկելով Բեյրութը, Բեքաայի հովիտը և Լիբանանի հարավային շրջանները։ Նշվում է, որ գործողությունը տևել է շուրջ տասը րոպե, որի ընթացքում թիրախավորվել են ավելի քան հարյուր ռազմական և հրամանատարական օբյեկտներ։

Իսրայելական կողմի տվյալներով՝ խոցված թիրախների թվում են «Հեզբոլլահի» շտաբները, հետախուզական կենտրոնները և կառավարման հիմնական հանգույցները, որոնք օգտագործվում էին Իսրայելի զինվորների և քաղաքացիական անձանց դեմ գործողություններ պլանավորելու համար։

Բացի այդ, հարվածներ են հասցվել ռազմական ենթակառուցվածքներին, ծովային օբյեկտներին, հրթիռների արձակման համակարգերին, ինչպես նաև «Ռադվան» էլիտար ստորաբաժանման և ավիացիոն միավորների հետ կապված ակտիվներին։