Լուրերը մեկ տողով. Մերձավոր Արևելքում լարվածությունը սրվում է․ շարունակվում են հարվածները

Անցած ժամվա լուրերը՝ հակիրճ և բովանդակային:

•  Հայաստանի և Քուվեյթի արտգործնախարարները հեռախոսազրույցում քննարկել են Մերձավոր Արևելքում ստեղծված իրավիճակը։ Հայաստանի ԱԳ նախարարը մտահոգություն է հայտնել քաղաքացիական օբյեկտներին հարվածների և զոհերի կապակցությամբ։

•  Իրանը նոր հրթիռային համազարկ է արձակել Իսրայելի ուղղությամբ։ Իսրայելի պաշտպանության բանակը հայտնել է, որ հակաօդային պաշտպանության համակարգերը աշխատում են սպառնալիքը կանխելու համար և բնակչությանը կոչ է արել հետևել անվտանգության հրահանգներին։

•  Իրանի մի շարք քաղաքներում, այդ թվում՝ Թեհրանում և Սպահանում, պայթյուններ են հնչել։ Հաղորդվում է, որ շարունակվում են ամերիկա-իսրայելական հարվածները երկրի տարբեր շրջանների ուղղությամբ։

•  ԱՄՆ Պետքարտուղարությունը թույլատրել է Սաուդյան Արաբիայում գտնվող ոչ կենսական նշանակության ամերիկացի աշխատակիցներին և նրանց ընտանիքներին լքել երկիրը անվտանգության նկատառումներով։

•  Տարածվում են տեղեկություններ, որ Իրանի Գերագույն առաջնորդի հնարավոր հաջորդ է դիտարկվում Մոջթաբա Խամենեին։ Ըստ որոշ աղբյուրների՝ նրա թեկնածությունը քննարկվել է այաթոլլաների խորհրդում։

•  ԱՄՆ զինված ուժերի Կենտրոնական հրամանատարությունը հայտնել է, որ Իրանի դեմ գործողություններին ներգրավված է ավելի քան 50 հազար զինծառայող։ Գործողությանը մասնակցում են նաև հարյուրավոր ռազմական ինքնաթիռներ և ավիակիրներ։

•  Դուբայում հրդեհ է բռնկվել ԱՄՆ հյուպատոսության շենքում։ Միջադեպը տեղի է ունեցել Իրանի շուրջ տարածաշրջանային լարվածության ֆոնին։

•  Իրանի դեսպանը հայտարարել է, որ երկրի արտաքին քաղաքականությունը շարունակելու է հիմնվել նախկին առաջնորդի ձևավորած ուղեգծի վրա։ Նա նաև նշել է, որ Իրանի դեմ գործողությունները վտանգ են ներկայացնում տարածաշրջանային կայունության համար։

•  Իրաքի Էրբիլ քաղաքում մի քանի պայթյուն է որոտացել անօդաչու սարքի ընկնելու հետևանքով։ Միաժամանակ տեղական խմբավորումը հայտարարել է, որ անօդաչուներով հարձակվել է ԱՄՆ զինծառայողների օգտագործած հյուրանոցի վրա։

•  Իսրայելի բանակը հայտնել է, որ Իրանի դեմ գործողությունների ընթացքում արդեն օգտագործվել է ավելի քան 4000 ավիացիոն զինամթերք։ Հակամարտության սկզբից ի վեր իրականացվել են նաև հարյուրավոր մարտական թռիչքներ։

•  ԱՄՆ պետքարտուղարը հայտարարել է, որ Վաշինգտոնը արագացնում է Իրանի դեմ գործողությունները և պատրաստ է նոր հարվածների։ Նա նաև կոչ է արել տարածաշրջանում գտնվող ամերիկացիներին անհրաժեշտության դեպքում դիմել օգնության համար։

•  Սերբիայի նախագահը զգուշացրել է, որ Հորմուզի նեղուցի հնարավոր փակումը կարող է ծանր հետևանքներ ունենալ նավթի գների և եվրոպական տնտեսության համար։ Նրա խոսքով՝ դա կարող է խորացնել էներգետիկ ճգնաժամը։

•  Ֆրանսիայի նախագահը հայտարարել է, որ «Շառլ դը Գոլ» ավիակիրը վերատեղակայվել է Միջերկրական ծովում։ Նա նաև նշել է, որ հակամարտության լուծումը պետք է գտնվի դիվանագիտական բանակցությունների միջոցով։