50 տարվա մուտքի արգելքից հետո, ստուգումներ են սկսվել Սաբուրովի նկատմամբ
Ղազախստանի Ազգային անվտանգության կոմիտեն (ԱԱԿ) ստուգում է սկսել ստենդափ-կոմիկ Նուրլան Սաբուրովի նկատմամբ։ Այս մասին РИА Новости-ին հայտնել են գերատեսչությունից՝ նշելով, որ իրականացվում են համապատասխան ստուգողական միջոցառումներ՝ կապված արտիստի գործողությունների հետ։
Կոմիտեից նաև հայտնել են, որ մինչև ստուգման ավարտը չի հրապարակվի այն հոդվածը, որի շրջանակում ուսումնասիրվում է գործը։ Այլ մանրամասներ առայժմ չեն ներկայացվում։
Հունվարի 30-ից Սաբուրովի մուտքը Ռուսաստանի Դաշնություն արգելվել է 50 տարի ժամկետով։ Իրավապահ մարմինների փոխանցմամբ՝ որոշումն ընդունվել է ազգային անվտանգության, օրենսդրության պահպանման և ավանդական հոգևոր-բարոյական արժեքների պաշտպանության նկատառումներով։
Դրանից հետո ղազախ ակտիվիստ Մարատ Տուրիմբետովը հայտարարել է, որ գլխավոր դատախազություն դիմում է ներկայացրել՝ պահանջելով ուսումնասիրել Սաբուրովի կողմից 2025 թվականի ամռանը ռուսական զինծառայողներին տասը մոտոցիկլ փոխանցելու վերաբերյալ տեղեկությունը։ Նրա կարծիքով՝ այդ գործողությունները կարող են որակվել որպես վարձկանության ֆինանսավորում և ապահովում, ինչը Ղազախստանի օրենսդրությամբ ենթադրում է մինչև 12 տարվա ազատազրկում։
