Մասկի՝ Starlink-ը փակելու որոշումից հետո, ռուսական ռազմական ստորաբաժանումների գրեթե 90%-ը կորցրեց կայուն կապը
Իլոն Մասկի կողմից Starlink արբանյակային կապի անջատման որոշումից հետո ռուսական ստորաբաժանումների գրեթե 90 տոկոսը կորցրել է կայուն կապը։ Այս մասին գրում է բրիտանական The Telegraph պարբերականը՝ անդրադառնալով Ուկրաինայի զինված ուժերի հակահարձակմանը և Դնեպրոպետրովսկի ու Զապորոժիեի մարզերի սահմանագոտում ուկրաինական ուժերի հաջողություններին։
Հրատարակությունը նշում է, որ ռուսական զորքերի համար լրացուցիչ խնդիրներ են առաջացրել նաև Telegram հարթակի նկատմամբ սահմանափակումները։
The Telegraph-ը նաև գրում է, որ Ուկրաինան հարվածներ է հասցնում Ռուսաստանի խորքային շրջաններին՝ փորձելով հակադարձել այն տպավորությանը, թե Մոսկվան առավելություն ունի պատերազմում։
Պարբերականի փոխանցմամբ՝ «Ֆլամինգո» հրթիռներով հարված է հասցվել Վոլգոգրադի մերձակայքում գտնվող զինամթերքի պահեստին և Տամբովի մարզի հրթիռային գործարանին։ Բացի այդ, նշվում է Սուջայի ուղղությամբ նշանակալի հարվածի մասին, որի հետևանքով ոչնչացվել է 6000 անօդաչու սարք։ Սա, ըստ հրապարակման, Մոսկվայի համար պատերազմի ողջ ընթացքում գրանցված ամենախոշոր կորուստներից մեկն է։
