Իրավիճակը լարվում է․ ԱՄՆ-ն ուժեղացնում է ռազմական ներկայությունը Մերձավոր Արևելքում․ CNN
ԱՄՆ-ն շարունակում է մեծացնել իր ռազմական ներկայությունը Մերձավոր Արևելքում՝ Իրանի հասցեին հնչած հայտարարությունների ֆոնին։Նախագահ Դոնալդ Թրամփի կողմից հնարավոր ռազմական գործողությունների մասին հայտարարություններից հետո Պարսից ծոցի շրջան է տեղափոխվել ԱՄՆ ռազմածովային ուժերի հարվածային խումբը։
Այն բաղկացած է երեք ականակիրներից, որոնք զինված են «Tomahawk» թևավոր հրթիռներով, ինչպես նաև USS Abraham Lincoln ավիակիրը։ Ավիակիրի վրա կարող են տեղակայվել մինչև 90 տարբեր տեսակի թռչող սարքեր՝ կործանիչներ, ռմբակոծիչներ, ռադիոէլեկտրոնային պայքարի և հեռահար ռադիոլոկացիոն հայտնաբերման ինքնաթիռներ, ինչպես նաև ուղղաթիռներ։
CNN-ի աղբյուրների գնահատմամբ՝ USS Abraham Lincoln-ը կարող է դառնալ Իրանի դեմ հնարավոր հարվածի հիմնական գործիքը։ Միաժամանակ չի բացառվում նաև տարածաշրջանում գործող ամերիկյան ռազմակայանների ներգրավումը։ Նշվում է, որ ԱՄՆ-ն Մերձավոր Արևելքում ունի ութ մշտական և ավելի քան մեկ տասնյակ ժամանակավոր ռազմակայաններ, այդ թվում՝ Քաթարում, Իրաքում, Քուվեյթում, Բահրեյնում, Արաբական Միացյալ Էմիրություններում և Օմանում։
Council on Foreign Relations վերլուծական կենտրոնի տվյալներով՝ 2025 թվականի ամռանը Մերձավոր Արևելքում գտնվել է 40-ից 50 հազար ամերիկացի զինծառայող։
Ավելի վաղ հայտնել էինք Իրանի դեմ ռազմական գործողությունների մեկնարկի վերաբերյալ ԱՄՆ նախագահ Դոնալդ Թրամփի մտադրությունների մասին։
