Իրանի դեմ ռազմական գործողությունների մեկնարկը՝ Թրամփի սեղանին․ The New York Times

ԱՄՆ նախագահ Դոնալդ Թրամփը դիտարկում է Իրանի դեմ հնարավոր ռազմական գործողությունների տարբերակներ, այդ թվում՝ ամերիկյան զինված ուժերի սահմանափակ ներխուժումներ երկրի տարածք։ Այդ մասին գրում է The New York Times-ը՝ հղում անելով իր աղբյուրներին։

Ըստ հրապարակման՝ վերջին օրերին Պենտագոնը Թրամփին ներկայացրել է Իրանի դեմ գործողությունների ընդլայնված ցանկ, որը ներառում է հարվածներ միջուկային և հրթիռային ենթակառուցվածքներին, ինչպես նաև օպերացիաներ, որոնք ուղղված են երկրի բարձրագույն ղեկավարության դիրքերի թուլացմանը։ Նշվում է, որ այդ առաջարկները գերազանցում են նախկինում քննարկված տարբերակների շրջանակը և ներառում են նաև ամերիկյան հատուկ ստորաբաժանումների հնարավոր գործողություններ Իրանի տարածքում։

Թերթի տվյալներով՝ Թրամփը Թեհրանից պահանջում է լրացուցիչ քայլեր՝ միջուկային ծրագրի կրճատման և այն զինված խմբավորումների աջակցությունը դադարեցնելու ուղղությամբ, որոնք, Վաշինգտոնի գնահատմամբ, ապակայունացնում են Մերձավոր Արևելքը և սպառնում Իսրայելի անվտանգությանը։ Սպիտակ տանը քննարկվում է նաև նախկինում հնչեցված ուժի կիրառման սպառնալիքների իրագործման նպատակահարմարությունը, ինչպես նաև Իրանում իշխանափոխության հարցը։

Միևնույն ժամանակ աղբյուրները նշում են, որ Թրամփը դեռ չի տվել ռազմական գործողության վերջնական թույլտվություն և չի ընտրել առաջարկված սցենարներից որևէ մեկը։ Սպիտակ տան ներկայացուցիչների խոսքով՝ նախագահը շարունակում է բաց մնալ դիվանագիտական լուծման համար, իսկ ռազմական ճնշման ցուցադրումը հիմնականում նպատակ ունի Թեհրանին մղել բանակցությունների։