Պուտինի և Ուիթքոֆի բանակցությունները Կրեմլում տևել են ավելի քան 3,5 ժամ

Ռուսաստանի նախագահ Վլադիմիր Պուտինը, Յուրի Ուշակովը և Կիրիլ Դմիտրիևը փակ դռների հետևում հանդիպել են ԱՄՆ նախագահի հատուկ դեսպանորդ Սթիվ Ուիթքոֆի, Թրամփի փեսայի՝ Ջարեդ Քուշների և ավագ խորհրդական Ջոշ Գրյունբաումի հետ՝ Ուկրաինայում Ռուսաստանի կողմից սանձազերծված պատերազմը դադարեցնելու հնարավոր ուղիների ևս մեկ քննարկման համար։։

Կրեմլի մամուլի ծառայության հաղորդմամբ՝ հանդիպումը տևել է ավելի քան երեքուկես ժամ։

Հանդիպման արդյունքները պաշտոնապես չեն հրապարակվել։ Հրատարակության համաձայն՝ սպասվող քննարկումները ներառում էին Ուկրաինայի հետ կարգավորման հարցը և դրան առնչվող հարցեր։ Պուտինը նախկինում հայտարարել էր, որ կողմերը կքննարկեն Մոսկվային Խաղաղության խորհրդին հրավիրելու և ռուսական սառեցված ակտիվների հարցը։

Ռուսական լրատվամիջոցները հետագայում մեջբերել են Ուշակովի խոսքերը, որ «Կրեմլում կայացած հանդիպումը օգտակար էր բոլոր առումներով և՛ Ռուսաստանի, և՛ ԱՄՆ-ի համար»։

«Մենք համաձայնեցինք, որ անվտանգության հարցերով եռակողմ Ռուսաստան-ԱՄՆ-Ուկրաինա աշխատանքային խմբի առաջին հանդիպումը տեղի կունենա Աբու Դաբիում հունվարի 23-ին», - ասել է Ուշակովը։

ՏԱՍՍ-ի փոխանցմամբ, բանակցությունների ընթացքում Ռուսաստանը հայտարարել է, որ առանց տարածքային հարցի լուծման, Ուկրաինայում երկարաժամկետ կարգավորման հույս չկա: Ռուսաստանը կշարունակի լուծել խնդիրը մարտադաշտում, մինչև կարգավորման հասնելը: Խաղաղության խորհուրդը, Գրենլանդիան և մի շարք այլ թեմաներ քննարկվել են Պուտինի և ամերիկացիների հանդիպման ժամանակ Կրեմլում։