Գրենլանդիայում ստեղծված իրավիճակը չի վտանգում ՆԱՏՕ-ի գոյությունը․ Մեծ Բրիտանիայի վարչապետ
Մեծ Բրիտանիայի վարչապետ Քիր Սթարմերը հայտարարել է, որ ԱՄՆ-ի կողմից Գրենլանդիայի նկատմամբ հնչեցվող հավակնությունները չի դիտարկում որպես ՆԱՏՕ-ի «վերջի սկիզբ»։ Channel 4 հեռուստաալիքին տված հարցազրույցում նա նշել է, որ թեև համաձայն չէ ԱՄՆ նախագահ Դոնալդ Թրամփի մոտեցմանը Գրենլանդիայի հարցում և մաքսատուրքերի հնարավոր սահմանման սպառնալիքներին, այնուամենայնիվ կիսում է Արկտիկայում անվտանգության ամրապնդման անհրաժեշտության տեսակետը։
Վարչապետի խոսքով՝ Միացյալ Նահանգները շարունակում են մնալ Մեծ Բրիտանիայի առանցքային գործընկերը պաշտպանության, անվտանգության և հետախուզության ոլորտներում։ Նա ընդգծել է, որ ՆԱՏՕ-ի միասնականության պահպանումը կենսական նշանակություն ունի՝ այն անվանելով աշխարհի պատմության մեջ գոյություն ունեցած ամենաարդյունավետ ռազմական դաշինքը։
Ստարմերը հավելել է, որ իր վերջին շփումների ընթացքում կենտրոնացած է եղել ՆԱՏՕ-ի ներսում համախմբման վրա՝ նպատակ ունենալով ամրապնդել դաշինքի միասնական դիրքորոշումը միջազգային մարտահրավերների պայմաններում։
