ԵՄ-ն կավելացնի ներդրումները Արկտիկայի անվտանգության ապահովման ոլորտում
Եվրոպական միությունը աշխատում է Գրենլանդիայում լայնածավալ ներդրումային փաթեթի և Արկտիկայի անվտանգությանն ուղղված միջոցառումների մշակման ուղղությամբ։ Այս մասին Համաշխարհային տնտեսական ֆորումի շրջանակում Դավոսում ունեցած ելույթի ընթացքում հայտարարել է Եվրահանձնաժողովի նախագահ Ուրսուլա ֆոն դեր Լայենը։
Նրա խոսքով՝ ԵՄ-ն նախատեսում է սերտ համագործակցել Գրենլանդիայի և Դանիայի հետ՝ գնահատելու տեղական տնտեսության և ենթակառուցվածքների աջակցության լրացուցիչ հնարավորությունները։ Ֆոն դեր Լայենը նշել է, որ այդ գործընթացում կարևոր է հաշվի առնել տարածաշրջանի առանձնահատկությունները և երկարաժամկետ զարգացման առաջնահերթությունները։
Եվրահանձնաժողովի նախագահը նաև ընդգծել է, որ ԵՄ-ն մտադիր է Արկտիկայի անվտանգության հարցերում համագործակցել Միացյալ Նահանգների և այլ գործընկերների հետ։ Նրա խոսքով՝ տարածաշրջանի կայունությունն ու անվտանգությունը ընդհանուր շահ են, որոնք պահանջում են համատեղ մոտեցում և համակարգված գործողություններ։
Ֆոն դեր Լայենի հայտարարության համաձայն՝ ԵՄ-ն կավելացնի ներդրումները ոչ միայն Գրենլանդիայի տնտեսության զարգացման, այլև Արկտիկայի անվտանգության ապահովման ոլորտում՝ նպատակ ունենալով ամրապնդել տարածաշրջանի կայունությունն ու միջազգային համագործակցությունը։
