ԹՐԻՓՓ-ի շրջանակում սահմանային «ֆրոնտ օֆիսը» կարող է լիովին ավտոմատացված լինել․ Ալեքսանյան

Լինելու են «ֆրոնտ օֆիս» և «բեք օֆիս». որպես այդպիսին՝ այդ «ֆրոնտ օֆիսում» կարող է ընդհանրապես մարդ նստած չլինի՝ լինի սկաներ։ Այս մասին  ճեպազրույցում ասել է ՔՊ խմբակցության պատգամավոր Վահագն Ալեքսանյանը։

«Ամերիկայում սրա մասին խոսում էինք, վերջերս գործուղման էինք ՆԱՏՕ ԽՎ մեր պատվիրակությամբ: Այնտեղ՝ օդանավակայաններից մեկում, ուղղակի մոտեցնում ես քո անձը հաստատող փաստաթուղթը, ինքը սկանավորում է դա, հետո սկանավորում է քո դեմքը, ու այդ գործառույթը, որ պետք է մարդն իրականացնի, այդ մի սարքն իրականացնում է։

Մյուսը՝ բեռների սկանավորումը, ամբողջ աշխարհում շատ ընդունված բան է, որ բեռները սկանավորում են սարքերի միջոցով։ Կարող է և այդպիսի տարբերակ լինի. առանց ազգության ռոբոտներ ու մեքենաներ լինեն այդ տարածքում: Դա կրիտիկական խնդիր չէ, ընդհակառակը՝ դա առաջընթաց է, որին պետք է գնալ և ոչ թե որից պետք է խուսափել»,- նշել է նա։

Հիշեցնենք՝ ԹՐԻՓՓ ծրագրի համար Հայաստան-ԱՄՆ կենսագործման շրջանակի հրապարակման վերաբերյալ համատեղ հայտարարության Սահմանային անվտանգության և մաքսային հսկողության հիմնարար սկզբունքներում նշված էր, որ Հայաստանի ինքնիշխանությունն ու իրավազորությունը սահմանային և մաքսային գործողությունների նկատմամբ բացարձակ են և անքննարկելի։ Ակնկալվում է, որ սահմանային և մաքսային բոլոր գործունեությունները կիրականացվեն սահմանային կառավարման միջազգայնորեն ճանաչված չափանիշներին համապատասխան՝ պահպանելով օգոստոսի 8-ի հռչակագրի սկզբունքները՝ օգտագործելով «ֆրոնտ օֆիս - բեք օֆիս» (ընդունարան - գրասենյակ) գործառնական մոդելը։