Շարունակելու ենք նույն ոգով․ Թրամփը՝ Իրանում ստեղծված իրավիճակի մասին
Մենք մտադիր ենք շարունակել նույն ոգով։ ԱՄՆ նախագահ Դոնալդ Թրամփը Դեթրոյթում կայացած տնտեսական ֆորումի ընթացքում մի շարք հայտարարություններ է արել Մերձավոր Արևելքի իրավիճակի և Իրանի վերաբերյալ։ Նրա խոսքով՝ ԱՄՆ-ն պետք է շարունակի նույն քաղաքական գիծը, որը, ըստ իրեն, ապահովել է տարածաշրջանում հարաբերական խաղաղություն։ Այս մասին հայտնում է Fox News հեռուստաալիքը։
Թրամփը կրկին աջակցություն է հայտնել Իրանում հակակառավարական բողոքներին՝ հայտարարելով, որ երկիրը «մեծ պետություն էր», մինչև գործող իշխանություններ հաստատվելը։ Նա նշել է, որ ԱՄՆ-ի գործողություններն Իրանի նկատմամբ կարևոր դեր են ունեցել տարածաշրջանային անվտանգության ապահովման հարցում։
Սպիտակ տան ղեկավարի պնդմամբ՝ եթե այս տարվա հունիսին ԱՄՆ-ն հարվածներ չհասցներ Իրանին և չեզոքացներ նրա միջուկային հնարավորությունները, Մերձավոր Արևելքում խաղաղություն չէր լինի։ Նա հիշատակել է նաև ԻՊ առաջնորդ Աբու Բաքր ալ-Բաղդադիի և Իսլամական հեղափոխության պահապանների կորպուսի գեներալ Քասեմ Սուլեյմանիի սպանությունները՝ դրանք ներկայացնելով որպես արդյունավետ իրականացված գործողություններ։
Թրամփը չի մեկնաբանել Իրանի դեմ հնարավոր նոր հարվածների հարցը։ Միաժամանակ, Wall Street Journal-ը, հղում անելով իր աղբյուրներին, գրում է, որ Սաուդյան Արաբիան, Օմանը և Կատարը փորձում են համոզել Վաշինգտոնին հրաժարվել նման քայլերից՝ մտահոգություն հայտնելով, որ ԱՄՆ-ի ուղիղ միջամտությունը կարող է լուրջ ցնցումներ առաջացնել նավթային շուկաներում և բացասաբար ազդել ամերիկյան տնտեսության վրա։
