Մեզ չհաջողվեց համոզել ԱՄՆ-ին հրաժարվել Գրենլանդիան բռնակցելու իր ցանկությունից. Դանիայի ԱԳ նախարար
Մեզ չհաջողվեց համոզել Միացյալ Նահանգներին հրաժարվել Գրենլանդիան բռնակցելու իր ցանկությունից։ Մենք դեռ ունենք տարաձայնություններ, այս մասին ասել է Դանիայի արտաքին գործերի նախարարը Սպիտակ տանը տեղի ունեցած եռակողմ հանդիպումից հետո։
«Այսօր հանդիպել ենք Վենսի և Ռուբիոյի հետ։ Եկել էինք Գրենլանդիայի և Արկտիկայի անվտանգության վերաբերյալ մի շարք հարցեր քննարկելու։
Դանիայի Թագավորությունն արդեն ամրապնդել է իր սեփական ներդրումը՝ ռազմական կարողությունների համար լրացուցիչ միջոցներ հատկացնելով։ Ոչ թե շների սահնակներ, այլ նավեր, անօդաչու թռչող սարքեր, կործանիչներ և այլն։ Եվ մենք անկասկած պատրաստ ենք ավելին անել։ Մենք կշարունակենք բանակցությունները, որոշել ենք ստեղծել բարձր մակարդակի աշխատանքային խումբ՝ ուսումնասիրելու համար, թե արդյոք կարող ենք գտնել առաջ շարժվելու ընդհանուր ուղի»,-ասել է ԱԳ նախարարը։
Նա նշել է, որ Դանիայի և Գրենլանդիայի տարածքային ամբողջականության խախտումը լիովին անընդունելի կլինի։
Դանիայի արտաքին գործերի նախարարը հայտարարել է, որ Գրենլանդիայում ո՛չ Ռուսաստանից, ո՛չ էլ Չինաստանից սպառնալիք չկա։
