Թուրքիան անցնում է սահմանային ուժեղացված ռեժիմի․Իրանից միգրացիայի ռիսկ կա

Թուրքիան ձեռնարկել է անվտանգության բոլոր անհրաժեշտ միջոցները Իրանի հետ սահմանին՝ հնարավոր միգրացիոն հոսքերի ռիսկի պայմաններում։ Այս մասին «Ռիա Նովոստի»-ին հայտնել են Թուրքիայի նախագահի վարչակազմից՝ ընդգծելով, որ սահմանային իրավիճակը մնում է կայուն։

Վարչակազմի փոխանցմամբ՝ սահմանապահ ծառայություններն աշխատում են ուժեղացված ռեժիմով, իսկ անվտանգային իրավիճակը գտնվում է լիարժեք վերահսկողության ներքո։ Պաշտոնական աղբյուրները նշել են, որ ներկայում սահմանին արտակարգ զարգացումներ չեն արձանագրվել։

Իրանում բողոքի ցույցերը սկսվել են 2025 թվականի դեկտեմբերի վերջին՝ ազգային արժույթի՝ իրանական ռիալի արժեզրկման հետևանքով։ Մի շարք իրանական քաղաքներում բողոքի ակցիաները վերածվել են ոստիկանության հետ բախումների։ 

Հավելենք՝ Իրանի իշխանությունները հայտնել են բողոքի ցույցերի ընթացքում մոտ 2000 մարդու մահվան մասին։