«Այաչչոյի» նախկին նախագահը սպանվել է մոր հուղարկավորության ժամանակ

Ֆրանսիայի Կորսիկա կղզում սպանվել  է քաղաքական գործիչ և «Այաչչո» ֆուտբոլային ակումբի նախկին նախագահ Ալեն Օրսոնին։ Դեպքը տեղի է ունեցել նրա մոր հուղարկավորության արարողության ընթացքում՝  բազմաթիվ ներկաների ներկայությամբ։ Տեղեկատվությունը հայտնել է Le Parisien-ը։

Ըստ նախնական տվյալների՝ հարձակվողը կրակել է մեծ հեռավորությունից՝ օգտագործելով երկարափող հրազեն։ Հնչել են մի քանի կրակոցներ, որոնց հետևանքով 71-ամյա Օրսոնին մահացել է։ Դեպքի վայրում հայտնաբերվել են փամփուշտների հետքեր, իսկ նրա մահը պաշտոնապես հաստատվել է  կես ժամ անց։ Քննությունը վարում է ոստիկանության և ժանդարմերիայի համատեղ խումբը։

Ալեն Օրսոնին երկար տարիներ համարվել է կորսիկյան քաղաքական կյանքի ամենաքննարկվող գործիչներից մեկը։ Երիտասարդ տարիքում նա կապեր է ունեցել ծայրահեղ ազգայնական շրջանակների հետ, իսկ 1980 թվականին դատապարտվել է Փարիզում Իրանի դեսպանատան վրա զինված հարձակման համար՝ երկու տարի անցկացնելով բանտում։ Հետագայում նա ընդգրկվել է Կորսիկայի ազգային ազատագրական ճակատի ղեկավարության կազմում, ապա հիմնադրել է «Ինքնորոշման շարժում» կուսակցությունը։

1996 թվականին կորսիկյան ազգայնականների միջև ներքին բախումների ֆոնին Օրսոնին լքել է կղզին՝ բնակվելով ԱՄՆ-ում և Նիկարագուայում։ Հավելենք՝ Օրսոնին երկու անգամ գլխավորել է «Այաչչո» ֆուտբոլային ակումբը և եղել Ֆրանսիայի Պրոֆեսիոնալ ֆուտբոլային լիգայի խորհրդի անդամ։