Աջակցությունս մեր խիզախ հոգևորականներին, ովքեր միանում են Եկեղեցու մաքրման և բարենորոգման գործընթացին. ՔՊ պատգամավոր

Ազգային ժողովի «Քաղաքացիական պայմանագիր» խմբակցության պատգամավոր Անուշ Քլոյանը «Ֆեյսբուք»-ի իր էջում գրառում է կատարել՝ նշելով, որ կաթողիկոսի կարգավիճակը չի կարող համարվել օրինական, եթե այն ձեռք է բերվել եկեղեցական կանոնների խախտմամբ։

«Ըստ Հայ Առաքելական Սուրբ Եկեղեցու սահմանված կարգերի՝ զավակ ունենալու փաստը բացառում է կաթողիկոսական օծման իրավաչափությունը։

Տարիների ընթացքում տվյալ անձի վարքագիծը կրել է հակաեկեղեցական և հակապետական բնույթ՝ ուղեկցվելով լռությամբ այն գործընթացների նկատմամբ, որոնք հանգեցրել են երկրի թալանի, պետական արժեքների խաթարման և մարդկային ողբերգությունների։ Այս պայմաններում նրա կողմից հնչեցվող որևէ հայտարարություն կամ հրահանգ չի կարող ունենալ բարոյական կամ հոգևոր ուժ Եկեղեցու և հավատավոր ժողովրդի համար։

Տեր Գևորգ եպիսկոպոս Սարոյանը շարունակում է մնալ Հայաստանյաց Առաքելական Սուրբ Եկեղեցու Մասյացոտնի թեմի առաջնորդ։ Աջակցությունս մեր խիզախ հոգևորականներին, ովքեր միանում են Եկեղեցու մաքրման և բարենորոգման գործընթացին»,- գրել է Քլոյանը:

Հիշեցնենք՝ Մասյացոտնի թեմի առաջնորդ Տեր Գևորգ եպիսկոպոս Սարոյանը Գարեգին Բ-ի՝ հունվարի 10-ի որոշմամբ, ազատվել է թեմակալ առաջնորդի պաշտոնից։