ՌԴ տրանսպորտի նախարարությունը հաստատել է «Մարիներա» նավի հետ կապի կորուստը
Ռուսաստանի Դաշնության տրանսպորտի նախարարությունը պաշտոնապես հաստատել է, որ ԱՄՆ ռազմածովային ուժերը չեզոք ջրերում բարձրացել են «Մարիներա» նավի վրա, որից հետո խզվել է կապը նավի հետ։ Գերատեսչության տվյալներով՝ նավի կալանավորումը տեղի է ունեցել մոտավորապես մոսկովյան ժամանակով ժամը 15:00-ին՝ բաց ծովում, որևէ պետության տարածքային ջրերից դուրս։
Նշվում է, որ նավը ժամանակավոր թույլտվություն է ստացել Ռուսաստանի դրոշի ներքո նավարկելու համար 2025 թվականի դեկտեմբերի 24-ին։ ՌԴ տրանսպորտի նախարարությունը ընդգծել է, որ որևէ պետություն իրավունք չունի ուժ կիրառել այլ պետությունների իրավասությունների ներքո պատշաճ կերպով գրանցված նավերի նկատմամբ։
Հիշեցնենք` ԱՄՆ առափնյա պահպանությունը Հյուսիսային Ատլանտիկայում փոթորկի ժամանակ փորձել է գրավել ռուսական դրոշի ներքո ընթացող Marinera ("Մարիներա") լցանավը:
