ԱՄՆ պատերազմի նախարարը մեկնաբանել է «Մարիներ» լցանավի կալանավորումը
Ատլանտյան օվկիանոսում «Մարիներ» լցանավի կալանավորումը կապված է Վենեսուելայից պատժամիջոցների տակ գտնվող նավթի շրջափակման հետ։ Այդ մասին հայտարարել է ԱՄՆ պատերազմի նախարար Փիթ Հեգսեթը։
Ավելի վաղ ԱՄՆ բանակի Եվրոպական հրամանատարությունը հաստատել էր ռուսական «Маринера» նավթատար նավի առգրավումը Ատլանտյան օվկիանոսում։ Նշվում է, որ գործողությանը ներգրավված են եղել մի շարք ամերիկյան Pilatus U-28A Draco հատուկ նշանակության ինքնաթիռներ։
Արևմտյան լրատվամիջոցների փոխանցմամբ՝ Միացյալ Նահանգները փորձում է առգրավել Իսլանդիայի և Ֆարերյան կղզիների միջև գտնվող՝ ռուսական դրոշի ներքո նավարկող նավթատար նավը։ Ավելի վաղ տանկերը կրել է Bella 1 անվանումը, սակայն հետագայում փոխել է իր դրոշը և դարձել ռուսական նավ։
Ռուսաստանի արտաքին գործերի նախարարությունը հայտնել է, որ հետևում է իրավիճակին և այն բնութագրել է որպես աննորմալ։
