ԱՄՆ-ի համար Գրենլանդիայի ձեռքբերումը շահավետ տարբերակ է. Քերոլայն Լևիթ
ԱՄՆ-ի համար Գրենլանդիայի ձեռքբերումը կարող է դիտարկվել որպես շահավետ տարբերակ ազգային անվտանգության տեսանկյունից․ նման դիրքորոշում է ներկայացրել Սպիտակ տան մամուլի խոսնակ Քերոլայն Լևիթը։ Նրա խոսքով՝ այս հարցը նոր չէ ամերիկյան քաղաքական օրակարգում, և դեռևս 19-րդ դարում ԱՄՆ նախագահները տարբեր ժամանակահատվածներում անդրադարձել են Գրենլանդիայի վերաբերյալ գաղափարներին։
Լևիթը նշել է, որ նախագահ Դոնալդ Թրամփը չի բացառում տարբեր սցենարների քննարկումը՝ ընդգծելով, որ իր մոտեցումը տարբերվում է նախորդ նախագահներից։ Նրա ձևակերպմամբ՝ Թրամփը դիտարկում է բոլոր հնարավոր տարբերակները և ընտրում այն ուղիները, որոնք առավել համապատասխան են ԱՄՆ-ի շահերին։
Միևնույն ժամանակ Սպիտակ տան խոսնակը շեշտել է, որ Թրամփի համար առաջնահերթություն է մնում դիվանագիտական ճանապարհը։ Նրա խոսքով՝ թեև քննարկվում են տարբեր հնարավորություններ, այդ թվում՝ տեսական սցենարներ, ԱՄՆ ղեկավարության հիմնական նպատակն է խնդիրների լուծումը քաղաքական և դիվանագիտական մեխանիզմների միջոցով։
Սպիտակ տանը նաև ընդգծել են, որ Գրենլանդիայի շուրջ քննարկումները կապված են տարածաշրջանային անվտանգության, ռազմավարական դիրքի և գլոբալ մարտահրավերների համատեքստի հետ, սակայն որևէ կոնկրետ քայլերի վերաբերյալ պաշտոնական որոշումներ չեն հայտարարվել։
