Հայտնի դերասան Թոմ Հարդին Երևանում կարող էր մենամարտել Արման Ծառուկյանի հետ

«Վենոմ», «Խավարի ասպետը» և «Խելագար Մաքս» ֆիլմերի աստղ, բրիտանացի դերասան Թոմ Հարդին կարող էր իր պրոֆեսիոնալ գրեփլինգի նորամուտը նշել Երևանում՝ Hype FC մրցաշարի շրջանակում մրցելով UFC-ի թեթև քաշային կարգի առաջատար մարտիկ Արման Ծառուկյանի դեմ, գրում է armsport.am-ը։

Այս առաջարկի մասին հայտնել է Hype FC լիգայի ղեկավարներից Արման Մարտիրոսյանը՝ սոցիալական ցանցերում հրապարակելով դերասանի հետ անձնական նամակագրությունից մի հատված։ Մարտիրոսյանի խոսքով՝ Հարդին դիտարկվում էր որպես Շարա Բուլետի փոխարինող դեկտեմբերյան մրցաշարի համար։

«Թոմ Հարդին դեկտեմբերին պետք է գոտեմարտեր Շարա Բուլետի փոխարեն»,- գրել է Մարտիրոսյանը։

Նամակագրության մեջ Թոմ Հարդին շնորհակալություն է հայտնել առաջարկի համար, սակայն նշել է, որ չի կարող այն ընդունել զբաղվածության պատճառով։

«Արման, նախ՝ սա շատ շռայլ առաջարկ է։ Որտեղի՞ց և ինչո՞ւ է այն ծագել։ Կարծես թե սա շատ ավելի մեծ գումար է, քան սովորաբար վաստակում է BJJ պրակտիկայով զբաղվող ցանկացած պրոֆեսիոնալ մարզիկ: Բայց խոսքը դրա մասին չէ… Մարտից մինչ օրս ես խիստ զբաղված եմ նկարահանումներով, այնպես որ… Շատ շնորհակալ եմ, որ մտածել եք իմ մասին»։

Թոմ Հարդին հայտնի է որպես բրազիլական ջիու-ջիցուի սիրահար․ նա պարբերաբար մարզվում է, ունի կապույտ գոտի և մասնակցել է գրեփլինգի բարեգործական մրցաշարերի։

Ի վերջո Արման Ծառուկյանը Երևանում գոտեմարտել է Շարա Բուլետի հետ։ Վեց րոպե տևած մենամարտը անցկացվել է միայն ցավեցնող և խեղդող հնարքներով կանոններով։ Մարտիկներից ոչ մեկին չի հաջողվել վճռորոշ հնարք կիրառել, և գոտեմարտն ավարտվել է ոչ-ոքի։