Էդուարդը վաղուց հասունացել է եվրոպական թոփ-5 առաջնությունների համար․ եթե լինի շահավետ առաջարկ, պետք է գործել․ Բուլիկին

Ռուսաստանի հավաքականի նախկին հարձակվող Դմիտրի Բուլիկինը անդրադարձել է Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանի կարիերայի հեռանկարներին։ Փորձառու մասնագետի կարծիքով՝ ակումբի սանն արդեն դուրս է եկել ներքին առաջնության շրջանակներից և պատրաստ է որակական նոր քայլ կատարել։

«Եթե լինի շահավետ առաջարկ, պետք է գործել։ Էդուարդը վաղուց հասունացել է եվրոպական թոփ-5 առաջնությունների համար։ Նա հիանալի է հանդես գալիս ՌՊԼ-ում (Ռուսաստանի Պրեմիեր լիգա), սակայն անհրաժեշտ է մեծ նպատակներ դնել և ուժերը փորձել արտասահմանում»,- նշել է նա։

Նշենք, որ ընթացիկ մրցաշրջանում Սպերցյանը «Կրասնոդարի» առանցքային ֆուտբոլիստներից է։ Նա մասնակցել է 25 հանդիպման՝ դառնալով 9 գոլի և 12 գոլային փոխանցման հեղինակ։