Իրանի և Կատարի արտգործնախարարները քննարկել են Իսրայելի կողմից հրադադարի համաձայնագրերի խախտումները
Իրանի արտգործնախարար Աբբաս Արաղչին հեռախոսազրույց է ունեցել իր կատարցի գործընկեր շեյխ Մոհամմեդ բին Աբդուլռահման ալ Թանիի հետ, որի ընթացքում կողմերը մտքեր են փոխանակել տարածաշրջանային կարևոր հարցերի շուրջ, հաղորդել է IRNA լրատվական գործակալությունը։
Նախարարները մտահոգություն են հայտնել Պաղեստինում և Լիբանանում ստեղծված իրավիճակի վերաբերյալ՝ Իսրայելի կողմից հրադադարի համաձայնագրերի խախտումների, ինչպես նաև Գազայի և Լիբանանի վրա հարձակումների շարունակման և խաղաղ բնակիչների թիրախավորման պայմաններում։
Նրանք ընդգծել են միջազգային հանրության կողմից Իսրայելի վրա ճնշում գործադրելու անհրաժեշտությունը՝ իր պարտավորությունները լիովին կատարելու և ցեղասպանության, օկուպացիայի և էքսպանսիոնիզմի քաղաքականությունը դադարեցնելու համար։
Արաղչին և Ալ Թանին նաև քննարկել են Եմենում տեղի ունեցող վերջին զարգացումներն՝ ընդգծելով երկրի տարածքային ամբողջականության և միասնության պահպանման կարևորությունը։
Վերջին օրերին ԱՄԷ-ի կողմից աջակցվող Հարավային անցումային խորհրդի (ՀԱԽ) ուժերին հաջողվել է վերահսկողություն հաստատել Եմենի հարավային նահանգների մեծ մասի նկատմամբ։
Զինված խմբավորումը հայտարարել է, որ իրենց ներխուժումների նպատակը ծայրահեղականների վտարումն ու մաքսանենգության գործողությունների կանխումն է։
