ԱՄՆ-ն սկսել է ավելի լավ հասկանալ Մոսկվային. Լավրով

Ռուսաստանի արտաքին գործերի նախարար Սերգեյ Լավրովը Իրանի պետական հեռուստատեսության և ռադիոհեռարձակման կորպորացիային տված հարցազրույցում հայտարարել է, որ Վաշինգտոնի հետ վերջին շփումները որոշակի հույս են ներշնչում՝ ամերիկյան կողմը սկսել է ավելի խորությամբ ըմբռնել Մոսկվայի դիրքորոշումը։

Լավրովի խոսքով՝ շփումների ընթացքում նկատվում է մոտեցումների ավելի լուրջ վերլուծություն, ինչը կարող է հիմք դառնալ երկխոսության հետագա զարգացման համար։ Միևնույն ժամանակ նա չի խոսել կոնկրետ պայմանավորվածությունների կամ արդյունքների մասին՝ ընդգծելով, որ գործընթացը դեռևս բարդ և զգայուն փուլում է։

Հիշեցնենք, որ ավելի վաղ Ռուսաստանի նախագահի օգնական Յուրի Ուշակովը նշել էր, որ անհրաժեշտության դեպքում ռուս-ամերիկյան գագաթնաժողովի շուրջ կարելի է բավական արագ համաձայնության գալ։ Սակայն, նրա խոսքով, մինչ այս պահը Մոսկվան Վաշինգտոնից որևէ հստակ ազդանշան չի ստացել նման հանդիպման կազմակերպման վերաբերյալ։